لە چۆمان گەنجێک لەکاتی راوەماسی بە کارەبا گیان لەدەستدەدات

ئاڤا نیوز

لە ڕووباری قەزای چۆمان گەنجێک بەمەبەستی ڕاوەماسی کارەبای مۆلیدە بەکاردەهێنێت و بەهۆیەوە گیان لەدەستدەدات.

لێدوانی فەرمی: ڕەوەند هاودیانی، وتەبێژی بەرگریی شارستانی سۆران بە ئاڤا میدیای ڕاگەیاند: هاوڵاتیەک بەناوی (س.ٲ.ٲ) بەمەبەستی ڕاوکردی ماسی لەگەڵ دوو هاوڕێی ڕوویان لە ڕووباری ناوکێلەکان لە سنووری قەزای چۆمان کرد، بەهۆی بەکارهێنانی تەزووی کارەبا بۆ ڕاوکردن بووە هۆی گیانلەدەستدانی.

زانیاریی زیاتر: گەنجەکە دانیشتووی قەزای خەلیفانە و لەدایکبووی ساڵی 1994ـە، دوای گەیشتنی تیمەکان، تەرمەکەی لەنێو ڕووبار هێنرایە دەرەوە و گواسترایەوە بۆ نەخۆشخانەی ئاشتی و دواتر تەرمەکەی ڕەوانەی پزیشکی دادی کرا.

بەرگریی شارستانی سۆران داوا لە هاوڵاتیان دەکات دوور بکەونەوە لە ڕاوکردنی ماسی لەڕێگای بەکارهێنانی تەزووی کارەبا بۆ سەلامەتی گیانی خۆیان.