دۆناڵد ترەمپ هەڕەشەی زیادکردنی باجی گومرکی لە کەنەدا دەکات

ئاڤا نیوز

سەرۆکی ئەمریکا نیگەرانی خۆی بەرامبەر دوایین هەنگاوەکانی کەنەدا دژ بە کۆمپانیا ئەمریکیەکان دەردەبڕێت و هەڕەشەی زیادکردنی باجی گومرکی لەسەر بەرهەمە کەنەدییەکان دەکات.

وێنە گەورەکە: پەیوەندییە سیاسی و دیپلۆماسی و بازرگانییەکانی نێوان ئەمریکا و کەنەدا لە قۆناغێکی خراپدایە، دوای بانگەشەی دۆناڵد ترەمپ بە زیادکردنی کەنەدا بۆ سەر خاکی ئەمریکا و ناوهێنانی بە ویلایەتی نوێی ئەمریکا، جەنگی بازرگانی لە نێوان هەردوو وڵات دەستی پێکردووە و لە دوایین هەنگاودا، کەنەدا بڕیاری زیادکردنی باجی خزمەتگوزارییەکانی بۆ سەر کۆمپانیا تەکنەلۆژییەکانی ئەمریکا دەرکرد.

لێدوانی فەرمی: دۆناڵد ترەمپ، سەرۆکی ئەمریکا لە کۆشکی سپی بە میدیاکانی ڕاگەیاند: کەنەدا وڵاتێکی قورسە بۆ مامەڵەکردن و دانوستان، ماوەی چەندین ساڵە ئەمریکا ئەم کێشەیەی لەگەڵ کەنەدا هەیە، بە هۆی بڕیاری باجی خزمەتگوزارییە ژمارەییەکانی کەنەدا بۆ سەر کۆمپانیا تەکنەلۆژیەکانی ئەمریکا بڕیارمداوە بە ڕاگرتنی دانوستانە بازرگانییەکان لەگەڵ کەنەدا و زیادکردنی باجی گومرکی یەکێکە لە ئەگەرە بەهێزەکانی قۆناغی داهاتوو.

لەلایەکی دیکەوە: مارک کارنی، سەرۆکوەزیرانی کەنەدا لە وەڵامدا دانوستانە بازرگانییەکانی لەگەڵ ئەمریکا بە ئاڵۆز ناوزەند کرد و ڕایگەیاند: لە پێناو کەنەدییەکان هەوڵ دەدەین لەم دانوستانە ئالۆزە بەردەوام بین.