ڕوانگەی سووری: زیاتر لە هەزار کەس لە شەڕی سوەیدا کوژراون

ئاڤا نیوز

ڕوانگەی سووری بۆ مافەکانی مرۆڤ لە دوایین ئاماری کوژراوانی شەڕی سوەیدای ئاشکرای کرد، زیاتر لە هەزار کەس کوژراون.

چیرۆکی سەرەکی: لە ڕۆژانی ڕابردوودا، شەڕ و پێکدادان لەنێوان خێڵە بەدەوییەکانی عەرەب و چەکدارەکانی دروز لە پارێزگای سوەیدا ڕووی دا دواتر ڕێککەوتن کرا و شەڕەکە ڕاگیرا.

ژمارەکان وا دەڵێن: بەگوێرەی ڕوانگە سووری، 336 چەکداری دروزی، هاوکات 298 هاووڵاتی مەدەنیی دروز کوژراون، لەوانە 194ـیان گوللەباران کراون، لە بەرامبەردا 342 ئەندامی وەزارەتی بەرگریی و ئاسایشی گشتی کوژراون، هەروەها 21 هاووڵاتیی خێڵە بەدەوییەکان کوژراون لەوانە سیانیان مەدەنی بوون و گوللەباران کراون.

زانیاریی زیاتر: ڕوانگەکە دەڵێت؛ 15 ئەندامی هێزەکانی حکومەتی سووریا بە بۆردوومانی ئیسرائیل لەو ماوەیەدا کوژراون.

دوای شەڕە خوێناوییەکان چەند ڕۆژی ڕابردوو لە نێوان چەکدارە ناوخۆییەکانی دروز و چەکدارانی خێڵە بەدەوییەکان لە شاری سوەیدا، لە شەوی شەممەوەوە دۆخی شارەکە ئارام بووەتەوە.

ئەوەی پێویستە بیزانیت: لە ڕۆژی سێیەمی شەڕەکە هێزەکانی سوپای سووریا چوونە نێو شاری سوەیدا بۆ کۆتاییهێنان بە شەڕەکە، بەڵام ئیسرائیل بە پاساوی پاراستنی دروزەکان هێرشی کردە سەر ئەو هێزانە و ناچار بە کشانەوەی کردن، دواتر ڕۆژی چوارشەممەی ڕابردوو، ئیسرائیل بە چڕی چەندین پێگەی لە سووریا لەوانەش؛ باڵەخانەی دەستەی ئەرکانی سوپا و کۆشکی سەرۆکایەتیی کۆماری لە دیمەشق بۆردوومان کرد.