وەزارەتی شەهیدان: بۆ هێنانی کارتی نیشتمانی دوایین مۆڵەت دەدات

ئاڤا نیوز

وەزارەتی شەهیدان و ئەنفالکراوان، دوایین مۆڵەت بەوانە دەدات کە لە وەزارەتەکە مینحە وەردەگرن و کارتی نیشتمانیان نییە، پێویستە بە زووترین کات کارتی نیشتمانی ئامادە بکەن و بیبەن بۆ بەڕێوەبەرایەتییەکانی شەهیدان لەو سنوورەی مینحەکەی لێ وەردەگرن.

لێدوانی فەرمی: ئەحمەد مام ڕەسوڵ، بەڕێوەبەری گشتیی خزمەتگوزاریی کەسوکاری شەهیدان بە ئاڤا میدیای ڕاگەیاند، ئاگادارییەکە بۆ هەریەکە لە کەسوکاری شەهیدان، ئەنفالکراوان، بەرکەوتووانی چەکی کیمیاویی و زیندانیانی سیاسی، ئەوانەی مینحەیان لە وەزارەتی کاروباری شەهیدان و ئەنفالکراوان هەیە. پێویستە کارتی نیشتمانی بهێنن، بە پێچەوانەوە گرفت بۆ وەرگرتنی مینحەکانیان دروست دەبێت.

ئەحمەد مام ڕەسوڵ دەشڵێت: بەگوێرەی ڕێنمایی فەرمانگەی تەکنۆلۆژیای زانیاری، پێویستە هەموو ئەوانەی لە حکومەت مووچە وەردەگرن و ناویان لە سیستمی پەیڕۆڵ تۆمار دەکرێت کارتی نیشتمانییان هەبێت. دوایین وادەش مانگی 9ـی ئەمساڵە.

ئەوەی پێویستە بیزانیت: بەگوێرەی داتای وەزارەتی شەهیدان و ئەنفالکراوان، ژمارەی ئەوانەی مینحەکە وەردەگرن زیاتر لە 91 هەزار کەسە. لەو ژمارەیە زیاتر لە 40 هەزاریان کارتی نیشتمانییان نییە، بەمەش نزیکەی نیوەی ئەوانەی مینحەکە وەردەگرن کارتی نیشتمانییان نییە و پێویستە بەزووترین کات مامەڵەکانیان جێبەجێ بکەن.