بڕیارە لە هەشت مانگی داهاتوودا پرۆژەی ئاوی دەربەند تەواو بکرێت

ئاڤا نیوز

پرۆژەی ئاوی دەربەند لە ڕانیە کە ماوەی 19 ساڵە بەردی بناغەی دانراوە، دەستی بە کارەکانی کردووەتەوە و بڕیارە لە ماوەی هەشت مانگی داهاتوو پرۆژەکە تەواو بکرێت.

بۆچی گرنگە: پرۆژەی ئاوی دەربەند توانای دابینکردن و بەڕێکردنی ئاوی بۆ قەزاکانی ڕانیە و حاجیاوا و ناحیەی چوارقوڕنە هەیە و کێشەی کەمی ئاوی خواردنەوە لە سنووری بیتوێن چارەسەر دەکات.

لێدوانە فەرمییەکان: پێشڕەو محەممەد، سەرپەرشتیاری پرۆژەی ئاوی دەربەند بە ئاڤا نیوزی گوت: کارکردن بە مەبەستی تەواوکردنی پرۆژەکە دەستیپێکردووە، بەڵام بەهۆی ئەو کەلوپەلانەی کە بۆ پرۆژەکە لە دەرەوەی وڵات داوامان کردووە و نەگەیشتووەتە دەستمان کارەکان بە سستی بەڕێوەدەچن بەڵام لە هەوڵی تەواوکردنی پرۆژەکەداین.

سەلام عومەر، بەڕێوەبەری ئاوی راپەڕین بە ئاڤا نیوزی راگەیاند: گوژمەی پرۆژەی ئاوی دەربەند 30 ملیۆن دۆلارە، قەیرانی دارایی لە ڕابردوودا هۆکار بووە بۆ دواکەوتنی پرۆژەکە، بەڵام ئێستا ئەنجومەنی وەزیران تەواوكەری  30 ملیۆن دۆلاری بۆ پرۆژەکە دابینکردووە و کاری تێدا دەکەن.

زانیاریی زیاتر: پرۆژەی ئاوی دەربەند ساڵی 2005 بەردی بناغەکەی دانرا، ئاوی خواردنەوە بۆ سنووری بیتوێن دابیندەکات کە لە کاتژمێرێکدا توانای بەڕێکردنی زیاتر لە سێ مەتر سێجا ئاوی هەیە و سەرچاوەی ئاوی پرۆژەکە دەربەندی ڕانیە دەبێت.