ئەمریکا هێرشەکەی سەر کۆرمۆر سەرکۆنە دەکات

ئاڤا نیوز

باڵیۆزی ئەمریکا لە عێراق، هێرشەکەی سەر کێڵگەی غازی کۆرمۆر بە هێرش بۆ سەر ژێرخانی وزەی هەرێمی کوردستان ناو دەبات و "بە تووندی" سەرکۆنەی دەکات.

لێدوانی فەرمی: ئەلینا ڕۆمانۆوسکی، باڵیۆزی ئەمریکا لە عێراق، لە ڕێگەی تۆڕی کۆمەڵایەتیی ئێکسەوە پەیامێکی بڵاو کردەوە و ڕایگەیاند: "داوا لە دەسەڵاتی عێراقی دەکەین لێکۆڵینەوەیەکی تەواو بكات و کەسانی بەرپرسیار ڕاکێشی بەردەم دادپەروەری بکات، ئەمریکا لەگەڵ حکومەتی عێراق و حکومەتی هەرێمی کوردستان بەردەوام دەبێت بۆ پاڵپشتیکردنی ئاسایش، سەقامگیری و سەروەریی عێراق".

زانیاریی زیاتر: باڵیۆزی ئەمریكا لە عێراق  ئاگاداریی خۆی لەوەی کە هێرشەکە قوربانی لێکەوتووەتەوە نیشان دەدات و سەرەخۆشیی خۆی دەردەبڕێت.

 

لە لایەكی دیكەوە: وەزارەتی دەرەوەی ئەمریکا لە ڕاگەیێنراوێکدا ئاشکرایکرد: ئەمریکا سەرکۆنەی هێرشەکە دەکات، ئەمە هێرشە بۆ سەر ژێرخانی وزەی هەرێمی کوردستان و سەروەریی عێراق.

ئەوەی پێویستە بیزانیت: ئێوارەی دوێنێ هێرش كرایەسەر كێڵگەی غازی كۆرمۆر لە چەمچەماڵ و بەهۆیەوە چەند كەسێك گیانیان لەدەستدا و چەند كەسێكی دیكەش برینداربوون.