بەهۆی گەرماوە کاتژمێرەکانی دەوامی فەرمی لە عێراق کەم دەکرێتەوە

ئاڤا نیوز 

 

بەهۆی بەرزبوونەوەی پلەکانی گەرما لە شارەکانی عێراق، حکومەتی عێراق بڕیاریدا کاتژمێرەکانی دەوامی فەرمی بە درێژایی وەرزی هاوین لە سەرجەم پارێزگاکان کەم بکاتەوە.

وێنە گەورەکە: لە پارێزگاكانی نێوەڕاست و خوارووی عێراق پلەكانی گەرما بەشێوەیەكی بەرچاو بەرزبووەتەوە، بەشێک لە ناوچە و شارەکان پلەی گەرمی نیوەی کوڵان تێدەپەڕێنێت، ئەمەش حكومەتی ناچاركردووە چەند رێوشوێنێك بگرێتەبەر.

ڕاگەیێنراوی فەرمی: ئەمینداریەتی گشتیی ئەنجوومەنی وەزیرانی عێراق ڕایگەیاند: دەوامی فەرمیی فەرمانگەکانی حکومەت جگە لە پارێزگای بەغدا کاتژمێرێک پێشدەخرێت و کاتژمێرێک لە کۆتایی دەوام کەمدەکرێتەوە، واتە دەوامی فەرمی لە 07:00ی بەیانی بۆ 01:00 ی نیوەڕۆ دەبێت.

زانیاریی زیاتر: دەوامی بەشێک فەرمانگە حکومییەکان لە بەغدا لە کاتژمێر 06:00ی بەیانی تا 12:00 دەبێت و هەندێکیشیلت لە 07:00ی بەیانی بۆ 01:00 نیوەڕۆ و بەشێکی دیکەش وەکو ڕۆژانی ئاسایی دەبێت.

ئەوەی پێویستە بیزانیت: بڕیارەکە لە 23-06-2024 بەرکار دەبێت تاوەکو 29-08-2024.