شوێنەوار و پەرستگە وێرانکراوەکانی موسڵ نۆژەن دەکرێنەوە

ئاڤا نیوز

 

دوای وێرانکردنی چەندین ناوچەی شوێنەواری و پەرستگەی دێرینی شاری موسڵ لەلایەن داعشەوە، عێراق بە هاریکاریی یونسکۆ و چەند وڵاتێک، ئەو شوێنانە نۆژەن دەکاتەوە.

 

وێنە گەورەکە: ڕێکخراوی داعش لە ساڵی 2014 دەستی بەسەر شاری موسڵ دا گرت و لە ماوەیەکی کورت، زۆربەی پەرستگە دێرین و ناوچە شوێنەوارییەکانی شارەکەی وێران کرد، بەڵام ماوەی چەند ساڵێکە دەست بە نۆژەنکردنەوەی ئەو شوێنانە کراوە.

 

لێدوانی فەرمی: ئیبراهیم نوح، سەرپەرشتیاری ناوچە شوێنەوارییەکانی موسڵ بە ئاڤا نیوزی ڕاگەیاند، "پێش ئێستا گەشتیارێکی زۆر سەردانی شوێنە شوێنەوارییەکانی موسڵیان دەکرد، بەڵام داعش هات هەمووی وێران کرد و سیمایانی تێک دا، بەشێک لە تەمەنی ئەو شوێنانە بۆ هەزاران ساڵ دەگەڕێتەوە".

 

زانیاریی زیاتر: نەبی یونس، نەمرود، بەوابە، کۆشکی سەنحاریب و مزگەوتی نووری گرینگترین ئەو شوێنەوارە دێرینانەن کە داعش وێرانی کرد.

 

ئەوەی پێویستە بیزانیت: یونسکۆ و چەندین وڵاتی وەکو ئەڵمانیا، فەرەنسا، ئەمریکا، ئیتاگیا، ئیمارات و کەنەدا سەرپەرشتیی نۆژەنکردنەوەی شوێنەوار و پەرستگە وێرانکراوەکان دەکەن