بۆ هەڵبژاردنی پەرلەمانی کوردستان تەنیا یەک ناوەندی دەنگدان لە کەرکووک دەکرێتەوە

ئاڤا نیوز

 

کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، یەک ناوەندی دەنگدان بۆ هەڵبژاردنی خولی شەشەمی پەرلەمانی هەرێمی کوردستان لە پارێزگای کەرکووک دەکاتەوە.

 

وێنە گەورەکە: ڕۆژی 26-6-2024، نێچیرڤان بارزانی، سەرۆکی هەرێمی کوردستان بە مەرسوومێکی فەرمی ڕێککەوتی 20-10-2024ی وەک ڕۆژی بەڕێوەچوونی هەڵبژاردنی خولی شەشەمی پەرلەمانی کوردستان دیاری کرد.

 

لێدوانی فەرمی: عەلی بەیاتی، بەرپرسی ڕاگەیاندنی نووسینگەی کەرکووکی کۆمیسیۆنی هەڵبژاردنەکان بە میدیای عێراق گوت: کۆمسیۆنی باڵای سەربەخۆی هەڵبژاردنەکان لە ڕێگەی نووسینگەکەیەوە لە کەرکووک، یەک ناوەندی دەنگدان لە پارێزگای کەرکووک دەکاتەوە بۆ بەشداریکردن لە هەڵبژاردنەکانی پەرلەمانی کوردستان، ئەم ناوەندەش بۆ ئەوانە بەردەست دەبێت کە مافی دەنگدانیان هەیە لەم هەڵبژاردنەدا. 

 

ئەمەش بزانە: دوای دیاریکردنی وادەیەک بۆ بەڕێوەچوونی هەڵبژاردن، د. عیماد جەمیل، سەرۆکی تیمی ڕاگەیاندنی ئەنجوومەنی کۆمیسیاران بە ئاڤا نیوزی گوت: ئەو وادەیەی دیاریکراوە گونجاوە، ئامادەکارییەکانی کۆمیسیۆن بەردەوامن، ئامادەین و دەتوانین سەرپەرشتیی هەڵبژاردن بکەین.