وەزارەتی پلاندانانی عێراق: سەرژمێریی گشتی ڕەوەندی عێراقی ناگرێتەوە

ئاڤا نیوز

 

وەزارەتی پلاندانانی عێراق ڕایگەیاند، سەرژمێریی گشتیی دانیشتووان و نیشتەجێبوون ئەو عێراقیانە ناگرێتەوە کە لە دەرەوەی وڵات دەژین.

 

وێنە گەورەکە: بڕیارە لە 24-11-2024 سەرژمێریی گشتیی دانیشتووان و نیشتەجێبوون لە عێراق و هەرێمی کوردستان بکرێت و تاوەکو 15-12-2024 بەردەوام بێت.

 

لێدوانی فەرمی: عەبدولزەهرە هینداوی، گوتەبێژی وەزارەتی پلاندانانی عێراق بە ڕۆژنامەی "سەباح"ـی ڕاگەیاند: بەپێی ڕێنماییەکانی نەتەوەیەکگرتووەکان، سەرژمێریی گشتیی دانیشتووان و نیشتەجێبوون، خەڵکی وڵاتەکە و ئەوانەی دیکەش دەگرێتەوە کە لە ناو عێراق نیشتەجێن.

 

کاریگەری و لێکەوتەکان: هەموو هەوڵەکانی وڵاتان بۆ سەرژمێریی هاووڵاتییەکانیان لە دەرەوەی وڵاتەکانیان لە ڕابردوودا شکستی هێناوە، چونکە هیچ ڕێگایەک نییە بۆ گەیشتن بە ژمارەی ڕاستەقینەی ڕەوەندی ئەو وڵاتانە.

 

ئەوەی پێویستە بیزانیت: مانگی ئایاری ئەمساڵ یەکەم سەرژمێری ئەزموونیی لە ماوەی 14 ڕۆژ لە 86 ناوچەی هەرێمی کوردستان و عێراق کرا و داتای 45 هەزار خێزان کۆکرایەوە.

 

ژمارەکان وادەڵێن: ڕێژەی ڕەگەزی نێر 50.1%ـە، قەبارەی خێزانێکی مام ناوەند لە سەرجەم پارێزگاکان بریتی بووە لە شەش کەس.