دوای پشووی عاشوورا گفتوگۆی لایەنەکانی کەرکووک دەستپێدەکاتەوە

ئاڤا نیوز

15 ڕۆژ ماوە بۆ کۆتایی هاتنی ئەو وادە یاساییەی کە بۆ پێکهێنانی حکومەتی خۆجێیی کەرکووک دیاریکراوە، دوای پشووی عاشوورا جموجۆڵی لایەنە براوەکان دەستپێدەکات.

وێنە گەورەکە: دوای نزیکەی حەوت مانگ لە هەڵبژاردنی ئەنجوومەنی پارێزگای کەرکووک، ڕۆژی چوارشەممە 10-07-2024 یەکەمین کۆبوونەوەی ئەنجوومەن کرا و لایەنەكان ڕێككەوتن لەماوەی مانگێكدا پۆستەكان دیاری بكەن.

لێدوانی فەرمی: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک بە ئاڤا نیوزی گوت:"هەوڵێکی ئەرێنی لەنێوان سەرجەم لایەنەکان هەیە، بۆ ئەوەی لەسەر بنەمایەکی هاوبەش حکومەتی خۆجێی پێک بهێنرێت".

باکگراوند: ڕۆژی 18-12-2023 هەڵبژاردنی ئەنجوومەنی پارێزگاکان لە عێراق کرا، کورد لە پارێزگای کەرکووک توانی لەکۆی 16 کورسی، حەوت کورسی (یەکێتی پێنج کورسی و پارتی دوو کورسی) لەگەڵ کورسییەکی کۆتا بەدەستبهێنێت.