حکومەتی عێراق مووشەک و درۆن لە هاووڵاتیان دەکڕێتەوە

ئاڤا دیجیتاڵ

وەزارەتی ناوخۆی عێراق هەموو چەکەکانی دەست هاووڵاتیان دەکڕێتەوە، بە مووشەک و درۆنیشەوە.

وێنە گەورەکە: لیژنەی کۆنترۆڵکردنی چەکی بێمۆڵەت لە عێراق، لە چەند ڕۆژی داهاتوودا ڕێنمایی و پێوەری نوێ بڵاودەکاتەوە، نرخیش بۆ ئەو چەکانە دادەنێت کە لە هاووڵاتیانی دەکڕێتەوە.

لێدوانی فەرمی: عەمید میقداد موسەوی، گوتەبێژی وەزارەتی ناوخۆی عێراق لە لێدوانێکی ڕۆژنامەوانیدا ڕایگەیاند، هەموو جۆرە چەکێکی سووک و مامناوەند و قورس بە مووشەک و درۆنیشەوە لە هاووڵاتیان دەکڕینەوە.

ئەوەی پێویستە بیزانیت: پێویستە هاووڵاتیان لەڕێگەی ئۆنڵاینەوە فۆرمی فرۆشتنی چەک پڕبکەنەوە. هاووڵاتی بۆی هەیە تەنها یەک چەکی سووکی وەکو دەمانچە و کڵاشینکۆفی هەبێت.

زانیاری زیاتر:: فرۆشتنی چەک بە وەزارەتی ناوخۆی عێراق تاوەکو 31-12-2024 بەردەوام دەبێت، بۆ هەر پارێزگایەکیش بڕی یەک ملیار دینار تەرخان کراوە.