بەهۆی گرفتێکەوە دەرهێنانی پاسپۆرت بە سیستمی کۆن دەوەستێت

ئاڤا نیوز

بەڕێوەبەرایەتیی پاسپۆرتی پارێزگای هەولێر ڕایدەگەیێنێت، بەهۆی کێشەیەکی تەکنیکی لە بەغدا، بۆ ماوەیەکی نادیار مامەڵەی وەرگرتنی هاونیشتمانیان بۆ دەرهێنانی پاسپۆرتی جۆری A وەستاوە.

وێنە گەورەکە: لە عێراق و هەرێمی کوردستان دوو جۆری سیستمی پاسپۆرت هەیە، سیستمی کۆن کە بە جۆری A ناسراوە، دەرکردنی هەر پاسپۆرتێک بەم سیستمە هەفتەیەک تا 10 ڕۆژی پێدەچێت. جۆری دووەم سیستمی نوێی ئەلیکترۆنییە و دوای نۆرەگرتنی ئەلیکترۆنی، بە چەند خولەکێک پاسپۆرت دەردەکرێت.

زانیاری بەدەستهاتوو: ئاڤا نیوز زانیویەتی لە ڕۆژی سێشەممەی ڕابردووەوە، بەهۆی کێشەیەکی تەکنیکی لە بەغدا مامەڵەی پاسپۆرتی سیستمی جۆری A وەستاوە، بەهۆیەوە ناتوانرێت پەنجەمۆر وەربگیرێت و دانەوەی پاسپۆرت وەستاوە.

ئەوەی پێویستە بیزانیت: بەڕێوەبەرایەتیی پاسپۆرتی هەولێر داوا لە هاونیشتمانیان دەکات سەردانیان نەکەن تا ئەو کاتەی خۆیان ئاگاداری بڵاودەکەنەوە. ئەوەی ئێستا مامەڵەیان ڕایی دەکرێت تەنیا سیستمی جۆری ئەلیکترۆنییە و ئەم جۆرەیان هیچ کێشەیەکی نییە.