هاتنی هاووڵاتییانی سووریا بۆ عێراق قەدەغە نەکراوە

ئاڤا نیوز

لیژنەی باڵای ئەمنی لە عێراق، هەموو ئەو دەنگۆیانە ڕەتدەکاتەوە کە سەبارەت بە قەدەغەکردنی هاتنی هاووڵاتییانی سووری بۆ خاکی عێراق بڵاوکراوەتەوە و دەڵێت: " ئەو هەواڵانە هیچ بنەمایەکیان نییە".

چیرۆکی سەرەکی: ڕۆژی هەینی 1-8-2025، بەشێک لە میدیاکانی عێراق و تۆڕە کۆمەڵایەتییەکان لەزاری سەرچاوەیەکی ئاگادار بڵاویانکردەوە، بەفەرمانی سەرۆک وەزیرانی عێراق، هاتنی هاووڵاتییانی سووری بۆ عێراق لە ماوەی بەڕێوەچوونی زیارەتی چلەی ئیمام حوسێن بەتەواوی قەدەغەیە و فەرمانەکە ئەو کەسانەش دەگرێتەوە کە ڤیزای فەرمی مانگانە یان ساڵانەیان هەیە.

ڕاگەیێنراوی فەرمی: میقداد میری، وتەبێژی لیژنەی باڵای ئەمنی بۆ زیارەتە ملیۆنییەکان، لە بەیاننامەیەکدا ڕایگەیاند: لیژنەی باڵای ئەمنی بۆ زیارەتە ملیۆنییەکان ئەو دەنگۆیانە ڕەتدەکاتەوە کە لە میدیا و تۆڕە کۆمەڵایەتییەکاندا بڵاوبوونەتەوە سەبارەت بە قەدەغەکردنی هاتنەناوەوەی هاووڵاتیانی سووریا بۆ عێراق، و ئەم هەواڵانە هیچ بنەمایەکی ڕاستییان نییە.

زانیاریی زیاتر: لیژنەکە ڕوونیشیکردەوە، هەر کەسێک ڤیزای فەرمی هەبێت، جا چ بۆ مەبەستی گەشتیاری بێت یان زیارەت، ڕێگەی پێدەدرێت بە شێوەیەکی ئاسایی و بەپێی ڕێکارە یاساییەکان بێتە ناو خاکی عێراقەوە.