لێکۆڵینەوە لە ئاردی ئەم مانگە دەکرێت

ئاڤا نیوز

هاونیشتمانیانی چەند گەڕەکێکی ناو شار و دەرەوەی هەولێر گلەییان لە بەشە ئاردی ئەم مانگە هەبووە و لێکۆڵینەوە دەستیپێکردووە.

وێنە گەورەکە: مانگانە ئەو بەشە ئاردەی لەڕێگەی بریکارەکانی خۆراک بەسەر هاونیشتمانیان دابەش دەکرێت، لە گەنمی سایلۆکانی ناوخۆ وەردەگیرێ و لە ئاشەکان دەکرێت بە ئارد.

لێدوانی فەرمی: سیامەند قادر، بەڕێوەبەری ڕێکخستنی پسوولەی خۆراکی هەولێر بە ئاڤا نیوزی گوت: ڕۆژانە گلەییەکی زۆری هاونیشتمانیانمان پێدەگەیشت، دەیانگوت کواڵێتی ئاردی ئەم مانگە خراپە و بەکەڵکی نانکردن نایەت، بۆیە بڕیاردرا لیژنەیەک پێکبهێنرێت.

زانیاریی زیاتر: لیژنەکە سەردانی بریکارەکانی خۆراکی (بەحرکە، بەستۆرە، گردجووتیار، شێخەشەل) و لەناو شاریش سەردانی چەندین گەڕەکی دیکەیان کردووە، وەک 94ی زانکۆ و دارەتوو، لە هەر بریکارێک دوو کیلۆ ئارد وەرگیراوە و براوەتە تاقیگەی بەڕێوەبەرایەتیی دروستکردنی دانەوێڵە، هێشتا ئەنجامەکان دەرنەچووە، لە ئەگەری دەرکەوتنی خراپی کواڵێتی گەنمەکە لایەنی دابینکاری ئارد لێکۆڵینەوەی لەگەڵ دەکرێت.