پەیامی لاهوور شێخ جەنگی لەبارەی هەڵبژاردن: ئامادەین و دەیگۆڕین

کوردستان
18 شوبات

شەیری بکە لە:

پەیامی لاهوور شێخ جەنگی لەبارەی هەڵبژاردن: ئامادەین و دەیگۆڕین

لاهوور شێخ جەنگی. وێنە: سۆشیاڵ میدیای ناوبراو

ئاڤا نیوز

لاهوور شێخ جەنگی پەیامێکی نوێ لەبارەی هەڵبژاردنی پەرلەمانی کوردستان بڵاودەکاتەوە و بە جەختکردنەوە لەوەی تاکە ڕێگای گۆڕانکاری سندووقی دەنگدانە، دەڵێت: "دەیگۆڕین... بە هیوا و ئومێدەوە بۆ هەڵبژاردنی داهاتوو ئامادەین".

"سەرەتایەکی نوێ دەستپێدەکەین"

پەیامی فەرمی: لاهوور شێخ جەنگی لە سەرەتای پەیامەکەیدا ئاماژە بە ڕەوشی هەرێمی کوردستان دەکات و بە دۆخێکی "ناهەمواری سیاسی و ئیداری هەستیار و پڕ لە کێشە و قەیران" وەسفی دەکات.

بە ئاماژەکردن بەوەەی؛ ژیان و گوزەرانی زۆرینەی خەڵکی کوردستان لەوپەڕی خراپی دایە، بێبازاڕی و خراپی دۆخی کاسبکاران و ئیفلیجبوونی زۆرینەی کایەکان و بێهیوابوونی گەنجەکان، دەڵێت: "دۆخەکە لێمان دەخوازێت بە هەموومان ئەم قۆناغە هەستیارە تێپەڕێنین و پێکەوە سەرەتایەکی نوێ دەستپێبکەین، ڕێگا لە نغرۆبوونی زیاتر بگرێ و جۆرێک لە هەستانەوە و سەرپێخستنەوەی ژیانێکی شایستە بۆ خەڵک جێگیر بکەین، ئەوەش ئێستا تەنیا و تەنیا بە بەشداریکردنی فراوانی ئێوەی دەنگدەران دەبێت لە هەڵبژاردنەکانی داهاتووی پەرلەمانی کوردستاندا".

داواکاری ئاراستەی گەنجان و خەڵکی کوردستان دەکات

لاهوور شێخ جەنگی داوا لە خەڵکی کوردستان دەکات کە پرۆسەکە گرنگە و لە ئێستاوە بە هیوا و ئومێدێکی زۆرەوە خۆیان ساز و ئامادە بکەن، "ئەو گەنجانەی یەکەمجاریانە بەشداری دەکەن سەردانی بنکەکانی کۆمسیۆنی هەڵبژاردن بکەن و خۆیان تۆمار بکەن، زۆر گرنگە بە بایەخەوە بۆ ئەو هەڵبژاردنە بڕوانن، کە چەند جارێکە بە ئەنقەست و لە ترسی گۆڕانکاری دوادەخرێ، بەڵام لەوە دڵنیابن هەر دەبێ بکرێ، ئێستاش بەو بەدواداچوون و زانیارییانەی لای من هەن، تاکە ڕێگای گۆڕانکاری سندووقەکانی هەڵبژاردنن و کۆمەڵی نێودەوڵەتی مەبەستییەتی هەرێمی کوردستان بەرەو حوکمڕانییەکی باش بڕوات.

"واقیعی سیاسی گۆڕاوە و حیزبەکان خۆیان دەدزنەوە"

لاهوور شێخ جەنگی لە بەشێکی دیکەی پەیامەکەی دەڵێت: "ڕووداوەکانی دوو ساڵی ڕابردوو زۆر هاوکێشەیان لە ناوخۆی هەرێم و واقیعی سیاسیی عێراق و ناوچەکە گۆڕیوە کە وا دەکات دۆخی سیاسیی ئێستا و دوو ساڵ لەمەوبەر بە تەواوی جیاواز بێت، ئەو جیاوازییەش دەسەڵاتداران پێش خەڵک هەستیان پێکردووە، بۆیە هەڵبژاردن دوادەخەن. لەوەش دڵنیابن ئەگەر هەڵبژاردنی داهاتوو لە ئاستی عێراق و ناوچەکە و تەنانەت کۆمەڵگەی نێودەوڵەتی پڕ بایەخ نەبووایە، فشاریان نەدەکرد بۆ کردنی. بە دیوەکەی تریشدا ئەگەر ئەم هەڵبژاردنە کاریگەر نەبووایە ئەو حیزبانەی ئێستا بە ئەمری واقیع دەسەڵاتدارن هێندە خۆیان لە ئەنجامدانی نەدەدزییەوە و هەرجارە و بە بیانوویەک دوایان نەدەخست. هەر لێرەشەوە داواکارم سەرۆکایەتیی هەرێمی کوردستان بەزووترین کات کۆببێتەوە و وادەیەک دیاری بکات، داوا لە کۆمسیۆنی باڵای سەربەخۆی هەڵبژاردنەکانی عێراقیش دەکەم وادەی دەرکردن و نوێکردنەوەی کارتی دەنگدان درێژ بکاتەوە، تا دەرفەت بدرێت بەو دەنگدەرانەی هێشتا ناوی خۆیان تۆمار نەکردووە و کارتەکانیان وەرنەگرتۆتەوە".

"ئەجێندا هەرێمایەتییەکان مەترسیدارن"

بەگوتەی لاهوور شێخ جەنگی، ئێستا دەسەڵاتی سیاسی و ئیداریی حیزبەکانی هەرێم هەرگیز وەک پێشتر نییە و ئەجێندا هەرێمایەتییەکان مەترسیدارن، ئەو دەڵێت: "پەرلەمان هەڵوەشاوەتەوە، حکومەت کاربەڕێکەرە، فرۆشتنی نەوت بە بۆری ڕاگیراوە، کێشە داراییەکان لەگەڵ عێراق ئاڵۆزتر بوون، مامۆستایان لەسەر شەقامەکانن و ناڕەزایەتییان فراوان و فراوانتر دەبێت، خەڵک تەواو بێزارە، لە پاڵ هەموو ئەوانەدا دەسەڵاتی سیاسی هێشتا بە ناوی شەرعییەتی دەنگی خەڵکەوە لە ناوەوە و دەرەوەی هەرێم قسە دەکات، لێرەوەیە بە گرنگی دەزانم لە ڕێگای بەشداری هەڵبژاردنەکانەوە دەرفەتێک هاتۆتە پێشەوە شەرعییەتی دەنگی خۆتان بدەن بەو هێزانەی کە پێتان وایە دەتوانن خزمەتتان بکەن و سەرەتایەکی نوێ و جیاواز دەهێننە کایەوە".

"دەبێ هەموومان ئەرکی خۆمان جێبەجێ بکەین"

لە کۆتایی پەیامەکەیدا ڕوودەکاتە دەنگدەران و بەتایبەت ئەو گەنجانەی یەکەمجاریانە مافی بەشداریکردن لە هەڵبژاردنیان هەبێت و دەڵێت، تەنیا دوو ڕۆژ ماوە سەردانی بنکەکانی کۆمسیۆنی هەڵبژاردن بکەن و ناوی خۆتان تۆمار بکەن بۆ ئەوەی دەرفەتەکە لە دەست نەدەن، کە ساڵانێکی زۆرە تەحەمولی حوکمڕانییەکی ناتەندروست دەکەن.

ناوبراو دەشڵێت: "هەموومان پێکەوە ئەرکمانە شان بدەینە بەر چاککردنی ئەم دۆخە و گێڕانەوەی هیوا و هێنانەکایەی سەردەمێک کە حوکمڕانی لەبری گرووپ و تاقمێک لە بەرژەوەندی خەڵکی کوردستاندا بێت، ڕاستییەکی تەواو حاشاهەڵنەگریشە کە خوای گەورە نە لە خراپەوە بۆ باش و نە لە باشەوە بۆ خراپ ژیان و گوزەرانی خەڵکەکەی ناگۆڕێ ئەگەر خەڵک خۆی بەو ئەرکە هەڵنەستێت، بۆیە ئەرکی من و ئێوەی کەسوکاری سەربەرزی شەهیدان و پێشمەرگە و هێزە ئەمنییەکان و گەنجان و ژنان و مامۆستایان و تەواوی مووچەخۆران و سەرجەم چین و توێژەکانە، کە هەوڵبدەین سەرەتایەکی نوێ بۆ خەڵک و خاکی ئەم هەرێمە دەستپێبکەین، ئەوەش بەرپرسیارێتییەکی دەستەجەمعییە و دەبێ هەمووان بە ئەرکی ئینسانی و ئایینی و نیشتمانی و نەتەوەیی خۆیانی بزانن".