درۆنێكی پەكەكە لە نزیک ئامێدی دەکەوێتە خوارەوە

ئاڤا نیوز

 

درۆنێكی چەكدارانی پارتی كرێكارانی كوردستان (پەكەكە) لە نزیک قەزای ئامێدی كەوتە خوارەوە.

 

وێنە گەورەكە: شەڕ و پێکدادانی چەكدارانی پەكەكە و سوپای توركیا لە سنووری قەزای ئامێدی لە پارێزگای دهۆک بەردەوامە و بەهۆیەوە دەیان گوندی سنوورەكە چۆڵكراون، لە چەند ساڵی ڕابردوو، وێڕای شەهیدبوون و برینداربوونی چەندین هاونیشتمانی، زیانی زۆری داراییش بەر جووتیارانی دەڤەرەكە كەوتووە.

 

لێدوانی فەرمی: سەرچاوەیەكی ئەمنیی دەڤەرەكە تایبەت بە ئاڤا نیوزی ڕاگەیاند: پاشنیوەڕۆی ڕۆژی دووشەممە، درۆنێكی چەكدارانی پەكەكە لە كۆمەڵگەی كانێ كە چوار كیلۆمەتر  لە قەزای ئامێدی دوورە، كەوتووەتە خوارەوە.

 

لەلایەكی دیكەوە: ئەو سەرچاوەیە جەختی كردەوە ڕووداوەكە بێ زیانی گیانی بووە، ئاماژەی بەوەش دا كە درۆنەكە خۆی بەربووەتەوە نەک بەردرابێتەوە،  هێزە ئەمنییەكان گەیشتوونەتە شوێنەكە و سەرقاڵی لێكۆڵینەوەن بۆ دەستكەوتنی زانیاریی زیاتر.