بڕیارێکی نوێ لە وەزارەتی پەروەردەوە لەبارەی تاقیکردنەوەی پۆلی 12

ئاڤا نیوز

 

وەزیری پەروەردەی حکومەتی هەرێمی کوردستان، موژدەی هەڵگرتنی بڕیارێکی پێشووتری وەزارەتەکەی دەدات سەبارەت بە قوتابیانی پۆلی 12، کە ساڵی پار لە یەک بابەت یان دوو بابەت ماونەتەوە. 

 

لێدوانی فەرمی: د.ئالان حەمە سەعید، وەزیری پەروەردەی حکومەتی هەرێمی کوردستان لە گەشتی هەواڵەکانی کاتژمێر 7:00ی ئاڤا میدیا ڕایگەیاند: ئەمڕۆ نووسراوێک لە ئەنجومەنی وەزیران هاتووەتە وەزارەتی پەوەردە، ئەو بڕیارەی پێشووتر لەبارەی تاقیکردنەوەی یەک بابەتی و دوو بابەتی پۆلی 12 هەبوو، ئەم بڕیارە جێبەجێ ناکرێت. 

 

زانیاریی زیاتر: بەگوێرەی وتەی وەزیری پەروەردە، سێ هەزار و 48 قوتابی بەشی زانستی و چوار هەزار و 104 قوتابی وێژەیی ئەمساڵ بەبێ تاقیکردنەوەی دەرەکی دەتوانن بەشداری لە تاقیکردنەوەکان بکەن، بەجۆرێک دەتوانن تەنیا لەو دوو وانەیەی ماونەتەوە تاقیکردنەوە ئەنجام بدەن، ئەوانەشی خواستیان هەیە لە هەموو وانەکان تاقیکردنەوە بکەنەوە دەتوانن ئەنجامی بدەن.

 

باکگراوند: لیژنەی باڵای ئەزموونە گشتییەکانی وەزارەتی پەروەردە لە ڕابردوو بڕیاری دابوو، هەر قوتابییەکی پۆلی 12 لە یەک بابەت و دوو بابەت بمێنێتەوە، پێویستە ساڵی داهاتوو تاقیکردنەوەی دەرەکی بکات، بەمەرجی ئەوەی لە سێ بابەت زیاتر نەکەوێت ئینجا دەیتوانی بچێت تاقیکردنەوەکان سەرجەمی بابەتەکان بکات، بەڵام ئەم بڕیارە ئیدی جێبەجێ ناکرێت.