تەواوی زەوییەکانی جووتیارانی کەرکووک دەخرێنە ناو پلانی کشتوکاڵی

ئاڤا نیوز

 

دوای ڕووداوەکانی 16 ئۆکتۆبەر بە بڕیارێکی پارێزگاری کەرکووک بەرهەمی ئەو زەوییانەی کشتوکاڵین و کوژاوەن وەرنەدەگیرا، بەڵام دوای حەوت ساڵ پارێزگاری کەرکووک بڕیاریدا ئەمساڵ ئەو زەوییانە دەخرێنە ناو پلانی کشتوکاڵی.

 

لێدوانی فەرمی: دیار محەممەد پەیامنێری ئاڤا میدیا لەگەڵ ساتع ناسح، نوێنەری جووتیارانی تۆپزاوە قسەیکردووە دەڵێت: پێشووتر بەرهەمەکانمان لێ وەرنەدەگیرا لەبەرئەوەی بە بڕیاری ئەنجومەنی سەرکردایەتی شۆڕش و لیژنەی کارووباری باکوور ئەو زەوییانە دەستی بەسەرداگیرا بوو، ئیدارەی کەرکووکیش جووتیارانیان بێ بەش کردبوو لە پلانی کشتوکاڵی، بەڵام ئەمساڵ بەبڕیاری پارێزگاری نوێی کەرکووک زەوییەکان خرانە ناو پلانی کشتوکاڵی.

 

زانیاریی زیاتر: ساتع ناسح ئەوەش دەڵێت: کاتێک ئەو زەوییانە دەخرێنە ناو پلانی کشتوکاڵی بەو مانایە دێت، لە هەموو بڕیارەکانی وەزارەتی کشتوکاڵ سوودمەند دەبین، ساڵانە تۆومان بە نرخی پاڵپشتیکراو پێ دەدرێت و لە سایلۆکان گەنممان لێ وەردەگیرێت وەک هەر جووتیارێکی دیکە.

 

ئەوەی پێویستە بیزانیت: یەک ملیۆن و 200 هەزار دۆنم زەوی لە کەرکووک کێشەیان لەسەر هەیە، لەگەڵ ئەوەدا 170 هەزار دۆنم زەوی کوژاوە هەیە و حکومەت هیچ هاوکارییەکی نەکردوون بەشی هەرە زۆری ئەو زەوییانە هی جووتیارانی کوردە.

 

لەلایەکی دیکەوە: دوای پێنج جارە دانیشتن بڕیارە سبەی یەکێک لە خاڵەکانی کارنامەی پەرلەمانی عێراق، تایبەت بێت بە هەڵوەشاندنەوەی بڕیارەکانی ئەنجومەنی سەرکردایەتی شۆڕش لە سەردەمی بەعس.