سەرۆکایەتیی کۆماری عێراق: پێویستە سنوورێک بۆ هێرشەکانی ئیسرائیل دابنرێت

ئاڤا نیوز

 

سەرۆکایەتیی کۆماری عێراق هێرشەکەی ئیسرائیل بۆ سەر ئێران سەرکۆنە دەکات و بە پێویستی دەزانێت سنوورێک بۆ هێرشەکانی ئیسرائیل و فراوانبوونی گرژییەکان دابنرێت.

 

وێنە گەورەکە: کاردانەوەی وڵاتانی عەرەبی و ئیسلامی لە بەرامبەر هێرشی مووشەکی و ئاسمانیی ئیسرائیل بۆسەر چەند ئامانجێکی سەربازیی لە خاکی ئێران بەردەوامە، سەرۆکایەتی کۆماری عێراقیش لەوبارەیەوە هەڵوێستی خۆی ڕاگەیاند.

 

ڕاگەیێنراوی فەرمی: نووسینگەی ڕاگەیاندنی سەرۆکایەتی کۆماری عێراق ڕایگەیاند: بە تووندی ئیدانەی هێرشی ئیسرائیل بۆ سەر کۆماری ئیسلامی ئێران دەکەین و ئەمە بە پێشێلکردنی ئاشکرای یاسا نێودەوڵەتییەکان و سەروەری وڵاتان دەزانین و هەنگاوێکیشە بە ئاراستەی تێکدانی ئاسایش و سەقامگیریی ناوچەکە.

 

چارەسەرەکان: سەرۆکایەتی کۆماری عێراق داوا لە کۆمەڵگای نێودەوڵەتیی دەکات "بەرپرسیارێتی خۆی لە ئەستۆ بگرێت و هەنگاوی بەپەلە بگرێتەبەر بۆ دانانی سنوورێک بۆ کۆتاییهێنان بەم هێرشانە و ڕێگریکردن لە فراوانبوونی بازنەی ململانێکان".

 

ئەوەی پێویستە بیزانیت: بەرەبەیانی ڕۆژی شەممە 26-10-2024، ئیسرائیل بە چەند قۆناغێک هێرشی مووشەکیی و ئاسمانیی کردە سەر چەند دامەزراوەیەکی سەربازیی ئێرانی لە خاکی ئەو وڵاتە، ئەمەش وەک وەڵامێک بۆ هێرشەکانی سەرەتای ئەو مانگەی ئێران بۆسەر ئیسرائیل.