سەرۆکی پەرلەمان: دەبێت عێراق هەڵوێستی بوێرانەی هەبێت بۆ پاراستنی ئاسمانەکەی

ئاڤا نیوز 

 

سەرۆکی پەرلەمانی عێراق هێرشی ئیسرائیل بۆ سەر ئێران شەرمەزار دەکات و بە پێویستی دەزانێت هەڵوێستی بوێرانە بۆ پاراستنی ئاسمانی عێراق بگیرێتەبەر و ڕێگە نەدرێت پێشێل بکرێت.

 

ڕاگەیێنراوی فەرمی: نووسینگەی ڕاگەیاندنی موحسین مەندەلاوی، سەرۆکی پەرلەمانی عێراق بە وەکالەت ڕایگەیاند: هێرشی ئیسرائیل بۆ سەر کۆماری ئیسلامی ئێران بە تووندی شەرمەزار دەکەین و هاودەنگی و پشتیوانی عێراق لەگەڵ ئێران دووپات دەکەینەوە.

 

مەترسییەکان: مەندەلاوی هۆشداری دەدات لە هەوڵەکانی ئیسرائیل بۆ فراوانکردنی ململانێکان "بۆ هەڵاتن لە شکستە دووبارەبووەکانیان لە دوای زیاتر لە ساڵێک تۆفانی ئەقسا".

 

لەلایەکی دیکە: سەرۆکی پەرلەمان بە وەکالەت جەخت لەسەر "پێویستی هەڵوێستی بوێرانە بۆ پاراستنی ئاسمانی عێراق دەکاتەوە بۆ ئەوەی ڕێ لە پێشێلکردن و ڕێگەپێدان بە ئاسمانی عێراق بگیرێت".

 

ئەوەی پێویستە بیزانیت: بەرەبەیانی ڕۆژی شەممە 26-10-2024, ئیسرائیل هێرشی ئاسمانی کردە سەر چەند دامەزراوەیەکی سەربازیی ئێرانی لە خاکی ئەو وڵاتە، ئەمەش وەک وەڵامێک بۆ هێرشەکانی سەرەتای ئەو مانگەی ئێران بۆسەر ئیسرائیل.