هەفتەی داهاتوو پارتی و یەكێتی بۆ پێكهێنانی حكومەت كۆ دەبنەوە

ئاڤا نیوز

 

ئاڤا لە زاری وتەبێژی بزووتنەوەی گۆڕان زانیویەتی، لەمیانی كۆبوونەوەی یەكێتی و گۆڕان، قوباد تاڵەبانی، سەرۆكی شاندی دانووستانكاری یەكێتی ڕایگەیاندووە، هەفتەی داهاتوو لەگەڵ پارتی كۆدەبنەوە و ئەگەرەكانی پێكهێنانی حكومەت تاوتوێ دەكەن.

 

لێدوانی فەرمی: دلێر عەبدولخالق، وتەبێژی بزووتنەوەی گۆڕان، بە دەزگاكانی ڕاگەیاندنی وت، دەخوازین پارتی و یەكێتی هەنگاوەكانی پێكهێنانی حكومەت و كاراكردنەوەی پەرلەمان خێراتر بكەن و لەسەر بنەمای ستراتیژی نیشتیمانی دانووستان بكەن، لە پێناو خزمەتكردنی هاووڵاتیانی هەرێمی كوردستان.

 

لەلایەكی دیكەوە: هەر ئەمڕۆ مەكتەبی سیاسیی پارتی دیموكراتی كوردستان لە کۆبوونەوەی مانگانەی ئاسایی خۆیدا پێشنیازی جووڵانەوەی نەوەی نوێی بۆ بەشداریكردن لە حكومەت تاوتوێ كردووە.

 

ئەوەی پێویستە بیزانیت: دوێنێ چوارشەممە پارتی و یەکێتی بەجیا گەڕی دانووستانەکانیان بۆ پێکهێنانی کابینەی نۆی حکومەت دەستپێکرد و لەگەڵ چەند لایەنێک کۆبوونەوە.