دیوانی چاودێری دارایی عێراق: 80٪ـی مووچەخۆرانی هەرێمی کوردستان هەژماری بانکیان هەیە

ئاڤا نیوز

سەرۆکی دیوانی چاودێری دارایی عێراق و سەرۆکی لیژنەی دارایی لە پەرلەمانی عێراق کۆبوونەوە، یەکێک لە تەوەرەکانی گفتوگۆی نێوانیان چارەسەری کێشەی مووچەی هەرێمی کوردستان بوو.

 

وێنە گەورەکە: عەممار سوبحی، سەرۆکی دیوانی چاودێری دارایی عێراق لەگەڵ عەتوان عەتوانی، سەرۆکی لیژنەی دارایی لە پەرلەمانی عێراق کۆبوونەوە، بۆ گفتوگۆکردن لەسەر ڕەشنووسی یەکەمین هەمواری یاسای بودجەی گشتی فیدراڵی.

 

ئەوەی پێویستە بیزانیت: سەرۆکی لیژنەی دارایی باسی لە پێویستی پێگەیشتن و پەسەندکردنی ئەم هەموارکردنەوەیە کرد بەشێوەیەکی واقیعی و جێبەجێکردنی و کۆتاییهێنان بەو ناکۆکییەی هەیە لە نێوان حکومەتی فیدراڵی و حکومەتی هەرێمی کوردستان سەبارەت بە کەیسی نەوت.

 

ڕاگەیێنراوی فەرمی: لە ڕاگەیێنراوی فەرمی نووسینگەی سەرۆکی دیوانی چاودێری دارایی عێراقدا هاتووە:-

ـــ پێش کەڵەکەبوونی کێشەکان، لێکتێگەیشتنی نێوان حکومەتی هەرێمی کوردستان و حکومەتی فیدڕاڵی لەسەر داهاتی نەوتی و نانەوتی بکرێت.

ـــــ سەرجەم مووچەخۆرانی هەرێمی کوردستان هەژماری بانکیان بۆ دروست بکرێت، کە ئێستا 80%ـیان خاوەنی هەژماری بانکین.

ـــــــ پێش کۆتایی ئەمساڵ سەرجەم مووچەخۆرانی هەرێمی کوردستان، بایۆمتری بکرێن و ژمارەی وەزیفیان هەبێت.