توێژینەوەیەک: یارییە ڤیدیۆییەکان توانای مێشکی منداڵان زیاد دەکات

ئاڤا نیوز 

بەردەوام هۆشداریی دراوە بە دایک و باوکان تاوەکو منداڵەکانیان ئاگادار بکەنەوە لە خراپی زۆر بەکارهێنانی یارییە ڤیدیۆییەکان، ئێستا توێژینەوەیەکی نوێی زانستی کاریگەریەکی ئەرێنی بەکارهێنانی ئەو یاریانە ئاشکرا دەکات کە لەسەر مێشکی منداڵان هەیەتی.

 

کاریگەرییە ئەرێنییەکان: چەند توێژینەوەیەکی نوێ دەریانخستووە بەکارهێنانی یارییە ڤیدیۆییەکان کاریگەریی باشی هەیە لە فروانبوونی بیرکردنەوەی منداڵان و بەهێزکردن و گەشی مێشکیان، ئەمەش دوای ئەوە دێت پێشتر هەر هۆشداریی دەدرا لەوەی منداڵان پێویستە لە یارییە ڤیدیۆییەکان دووربکەونەوە. 

 

بڵاوکراوەی فەرمی: تۆرکێل کلینگبێرگ، مامۆستا لە بەشی زانستی دەمار لە پەیمانگای کارۆلینسکا ڕایگەیاند: شاشەکان توانای زیرەکی منداڵان لەناو نابات و نابێتە هۆی کەمکردنەوەی، یارییە ڤیدۆییەکان دەتوانێت هاوکار بێت بۆ بەرزکردنەوەی ئاستی زیرەکیان. 

 

ئەوەی پێویستە بیزانیت: توێژەرانی ئەم لێکۆڵینەوەیە تیشکیان نەخستووە سەر کاریگەرییە خراپەکانی ئەم یارییانە کە دەتوانێت لەسەر چالاکییە جەستەییەکان یاخوود چاوەکان هەبێت بەهۆی ڕووناکی شاشە، تەنها لایەنی ئەرێنی بەرجەستە کراوە کە دەبێتە هۆی زیادکردنی توانای مێشکیان.