دابەشکردنی مووچەی مووچەخۆران خێراتر دەکرێت

ئاڤا نیوز

 

گۆڕانکاریی لە لیستی دابەشکردنی مووچەی فەرمانبەران کرا و هەندێک فەرمانگە دابەشکردنی مووچەکانیان پێش خرا، ئەمڕۆش لە ڕێگەی ئامێرەكانی ئەی تی ئێم مووچەکانیان وەردەگرن.

 

زانیاریی بەدەستهاتوو: بەپێی زانیارییەكان كە لە تیمی پرۆژەی (هەژماری من)ـەوە دەست ئاڤاوە کەوتووە، ئەمڕۆ چوارشەممە 18-12-2024 مووچەی بەشێک لە مووچەخۆرانی هەرێمی کوردستان بە شێوازی دیجیتاڵی لە ڕێگەی كارت و ئامێرەكانی ڕاكێشانی پارەوە لە سەرجەم پارێزگاکانی هەرێمی کوردستان دابەش دەکرێت.

 

زانیاریی زیاتر: لە خشتەی وەزارەتی دارایی هەندێک فەرمانگەی وەزارەتی ناوخۆ، وەزارەتی داد، وەزارەتی ئەوقاف و هێزەکانی پۆلیس بڕیاربوو ڕۆژی شەممە 2024-12-21 دابەش بکرێت، بەڵام ئەمڕۆ بە کورتەنامەیەک ئاگادارداردەکرێتەوە،  تاوەکو لەڕێگەی هەژماری بانکیەوە مووچەكانیان وەربگرن، هاوکات وەزارەتی خوێندنی باڵا بڕیار بوو دووشەممەی داهاتوو 23-12-2024، مووچە وەربگرن، دابەشکردنە بۆ ئەمڕۆ  پێشخرا و دەتوانن مووچەکانیان لە ڕێگەی ئامێرەکان ڕابکێشن.

 

ئەوەی پێویستە بیزانیت: بۆ مووچەی مانگی 10ـی 2024، زیاتر لە 191 هەزار مووچەخۆر و فەرمانبەر، مووچەکانیان لە ڕێگەی (هەژماری من)ـەوە وەردەگرن.

 

باکگراوند: ڕۆژی دووشەممە 16-12-2024، وەزارەتی دارایی و ئابووری لە ڕاگەیێنراوێكدا، خشتەی مووچەی مانگی 10ـی بڵاوكردەوە و ئاماژەی بەوەشدا، ڕۆژی سێشەممە  2024-12-17 دەست بە دابەشكردنی مووچە دەكرێت و تاوەکو ڕۆژی دووشەممە 23-12-2024 مووچەی سەرجەم مووچەخۆران دابەش دەکرێت.