بەشەخۆراکی سلێمانی: ئەو لەتکە نۆکانەی مێشوولە لێی داوە بەکەڵکی خواردن دێن

ئاڤا نیوز

 

بەڕێوەبەرایەتیی دابەشکردنی بەشەخۆراکی سلێمانی لەبارەی ئەو لەتکە نۆکەی مێشوولە لێیداوە ڕوونکردنەوە دەدات، دەڵێت "ئاساییە و هاووڵاتیان دەتوانن بۆ خواردن بەکاری بێنن."

 

وێنە گەورەکە: ئەمڕۆ دەنگۆی ناردنی جۆرێک لەتکە نۆک لەلایەن عێراقەوە بۆ سلێمانی بڵاوبووەوە کە گوایە مێشوولە لێی داوە و بەکەڵکی خواردن نایەت، بەڕێوەبەرایەتیی بەشەخۆراکی سلێمانیش لەم بارەیەوە ڕوونکردنەوە دەدات.

 

لێدوانی فەرمی: کامەران محەممەد، بەڕێوەبەری دابەشکردنی خۆراکی سلێمانی، لەمبارەیەوە بە ئاڤا میدیای ڕاگەیاند:

٠ لە مانگی سێی ساڵی ڕابردوو ئەو لەتکە نۆکەمان بۆ هاتووە، ئاساییە مێشوولە لێیدابێت.

٠ ئێمە دەرمانی لێ دەدەین و مێشوولەکە مردار دەبێتەوە، بەگوێرەی یاسای عێراقیش مێشوولە مرداربووەکە حسابی پووشی بۆ دەکرێت.

٠ ئەگەر مێشوولە لە ناوکی نۆکەکەی نەدابێت، ئەوا بۆ خواردن ئاساییە و کێشەی نییە.

 

٠ بەشەخۆراکی زۆرمان بۆ دێت، ئەوەی زۆر بێزارمان دەکات پاقلەمەنییەکان و لەتکە نۆکە.

٠ مانگانە وەزارەتی بازرگانی عێراق دەرمانێکمان بۆ دەنێرێت بۆ ئەوەی لە پاقلەمەنییەکانی بدەین، چونکە دەزانن تووشی ئەم حاڵەتانە دەبین.

 

ئەوەی پێویستە بیزانیت: ئەو گەنجینانەی بەڕێوەبەرایەتیی دابەشکردنی خۆراکی سلێمانی بەشەخۆراکیان تێدا هەڵدەگیرێت، هیچ ساردکەرەوە و گەرمکەرەوەیان تێدا نییە، ئەمەش کاریگەری لەسەر خرا بوونی بەشە خۆراکەکان دروست دەکات. ئەگەر خۆراکێکیش کەڕوو لێی بدات، بەڕێوەبەرایەتیی بەشە خۆراک لێی بەرپرس دەبێت و دەیگۆڕێت.