هاوپەیمانیی ئیدارەی دەوڵەت: دەکرێت کێشەی مووچە بە گفتوگۆ چارەسەر بکرێت

ئاڤا نیوز

 

هاوپەیمانی ئیدارەی دەوڵەت ڕایدەگەیێنێت، هیچ هەڵوێستێکی سیاسی لەسەر پرسی مووچەی مووچەخۆرانی هەرێمی کوردستان نییە، جگە لە بواری تەکنیکی نەبێت. ئەویش دەکرێت لە ڕێگەی گفتوگۆ و لێکتێگەیشتنەوە چارەسەر بکرێت.

وێنە گەورەکە: هاوپەیمانیی ئیدارەی دەوڵەت کە هەموو لایەنە پێکهێنەرەکانی حکومەتی عێراق لەخۆدەگرێت، بە بەشداریی نێچیرڤان بارزانی و بافڵ تاڵەبانی لە بەغدا کۆبووەوە، یەکێک لە تەوەرەکانی کۆبوونەوەکە تاوتوێکردنی کێشەکانی هەولێر و بەغدا بوو بەتایبەت پرسی مووچە.

ڕاگەیێنراوی فەرمی: هاوپەیمانی ئیدارەی دەوڵەت لە ڕاگەیێنراوێکدا دەڵێت:

- هاوپەیمانی جەخت لەوە دەکاتەوە ئەمساڵ دوایین ساڵی تەمەنی پەرلەمان و حکومەتە، لەسەر هەموو لایەن و هێزە نیشتمانییەکان وا دەخوازێت زۆر وریابن لە جێبەجێکردنی ئەو بەڵێنانەی لە کارنامەی حکومەتدا هاتووەوە و  لەسەری ڕێککەوتوون، بەشێوەیەک پشتگیری لە سەقامگیری بکات.

- هاوپەیمانی پاڵپشتی خۆی بۆ ئەو پاکێجە چاکسازییە دارایی و ئابوورییانە ئاشکرا دەکات کە حکومەت پەسەندی کردووە و دەبێتە مایەی پاراستنی سەقامگیری دارایی و ئابووری. جەختیش لەوە دەکاتەوە هیچ هەڵوێستێکی سیاسی لەسەر پرسی مووچەی مووچەخۆرانی هەرێمی کوردستان نییە، جگە لە بواری تەکنیکی نەبێت. ئەو پرسانەش دەتوانرێت لە ڕێگەی گفتوگۆ و لێکتێگەیشتنەوە چارەسەر بکرێن دوور لە پەرەسەندنی میدیایی.

- هاوپەیمانییەکە داوای کرد عێراق بەردەوام بێت لەسەر ئەو ڕێبازە جێگیرە لە مامەڵەکردن لەگەڵ ئاڵنگاریی و ڕووداوە هەرێمی و نێودەوڵەتییەکان، بەشێوەیەک بەرژەوەندییەکانی عێراق بپارێزێت و دووربکەوێتەوە لە ململانێ و قەیرانەکان.

- لە کۆبوونەوەکەدا تیشک خرایە سەر بارودۆخی سووریا، هاوکات ئامادەیی عێراق بۆ پاڵپشتیکردن لە گەلی سووریا و چاودێریکردنی گۆڕانکارییە سیاسییەکان دووپاتی لەسەر کرایەوە.

باکگراوند: بڕیارە سبەی دووشەممە نێچیرڤان بارزانی لەگەڵ چوار سەرۆکایەتییەکەی عێراق (کۆمار، حکومەت، پەرلەمان و ئەنجوومەنی دادوەری) و سەرکردەی لایەنە سیاسییەکان کۆدەبێتەوە، تەوەری سەرەکیش چارەسەرکردنی پرسی مووچە و کێشەکانی نێوان هەولێر و بەغدا دەبێت.