لە کۆبانێ هێرش دەکرێتە سەر نووسینگەی ئەنەکەسە و دەسووتێنرێت

ئاڤا نیوز

لە کۆبانێ گرووپێک هێرش دەکەنە سەر نووسینگەی ئەنەکەسە و کەلوپەلەکانی تێکدەشکێنن، ژماریەک هاونیشتمانیش بریندار دەبن.

چی ڕوویدا: ئەمڕۆ هەینی لە شاری کۆبانێی ڕۆژئاوای کوردستان لە کاتی بەڕێوەچوونی چالاکییەک بەبۆنەی تێپەڕبوونی 45 ساڵ بەسەر کۆچی دوایی مەلا مستەفا بارزانی، گرووپێک بە ناوی گەنجانی شۆڕشگێڕ (الشبيبة الثورية) هێرش دەکەنە سەر بارەگای ئەنجوومەنی نیشتمانی کورد لە سووریا (ئەنەکەسە).

زانیاری زیاتر: گرووپەکە بە دار و دەموچاوی بەستراو هێرشیان کردووەتە سەر بەشداربووانی چالاکییەکە، دواتر کەلوپەلەکانی ئۆفیسەکەیان تێکشکاندوون، بیڕێزییان بە ئاڵای کوردستان کردووە و دواتر ئاگریان لە بەشێکی کەلوپەلەکان بەرداوە.

لێدوانی فەرمی: سلێمان ئۆسۆ، ئەندامی دەستەی سەرۆکایەتیی ئەنەکەسە بە ئاڤا نیوزی ڕاگەیاند، بەهۆی هێرشەکە دەیان لە بەشداربووانی چالاکییەکە بریندار بوون.

بۆچوونی بەرامبەر: گرووپی گەنجانی شۆڕشگێر لە پارتی یەکێتیی دیموکرات (پەیەدە) نزیکە، تاوەکو ئێستا میدیاکانی پەیەدە و بەڕێوەبەرایەتی خۆسەر هیچ زانیارییەکیان لەبارەی ڕووداوەکە بڵاونەکردووەتەوە.