پزیشکێکی عێراقی دەبێتە سیمبولی مرۆڤایەتی لە غەززە

ئاڤا نیوز

دوای ڕاگەیاندنی ئاگربەست لە غەززە، پزیشکێکی عێراقی بۆ یەکەمجار لە ناوەڕاستی شاری غەززە دەردەکەوێت کە چەندین نەشتەرگەری لەو شارە کردووە و ژیانی دەیان کەسیشی لە مردن ڕزگارکردووە.

چیرۆکی سەرەکی: محەممەد تاهیر، پزیشکێکی بەڕەگەز عێراقییە، لە ماوەی 467 ڕۆژدا خۆبەخشانە زیاتر لە 300 نەشتەرگەریی بۆ بریندارانی کەرتی غەززە کردووە. هاوکات  چاودێریی تەندروستیی سەدانی دیکەشی کردووە.

لێدوانی فەرمی: محەممەد تاهیر، پزیشکی پسپۆڕی نەشتەرگەری لە گرتەیەکی ڤیدیۆییدا دەڵێت:

- دوای بیرکردنەوەیەکی زۆر بڕیارمدا لە غەززە بمێنمەوە بۆ ئەوەی بەردەوام بم لە کاری مرۆیی وەک پزیشکێک کە سوێندم خواردووە.

- ئەو شوێنەی کارم تێدا دەکرد و نەشتەرگەرییەکانم تێدا ئەنجام دەدا، لەڕووی تەندروستیی و پێداویستییەکانەوە وەک پێویست نەبوو و کەموکوڕی زۆری تێدابوو، هەروەها مەترسیی زۆری هێرشەکانی ئیسرائیلی لەسەر بوو.

- ئەو پزیشکە عێراقییە چیرۆکێکی کاریگەر دەگێڕێتەوە و دەڵێ “هەرگیز بیرم ناچێتەوە کاتێک منداڵێکی کچیان هێنایە لام کە لە ئەنجامی بۆردوومانی فڕۆکەکانی ئیسرائیل قۆڵێکی لەدەستدابوو و هاواری بۆ قۆڵەکەی دەکرد، داوام لە کەسوکارەکەی کرد کە بچن لەنێو خۆڵ و خاشاکی ماڵە ڕووخاوەکەیان بگەڕێن و قۆڵی منداڵەکە بدۆزنەوە، دواجار دۆزییانەوە و هێنایان و نەشتەرگەییەکی سەختمان بۆی ئەنجامدا و خۆشبەختانە سەرکەوتوو بووین.”

باكگراوند: بەهۆی هێرشەکانی ئیسرائیل بۆ سەر کەرتی غەززە و بە ئامانجگرتنی نەخۆشخانەکان، سێکتەری تەندروستی تووشی زیانێکی زۆر بووەوە، هاوکات ڕێکخراوی تەندروستی جیهانی بڵاویکردەوە 7%ـی دانیشتووانی کەرتی غەززە لەو هێرشانە کوژراون  یان برینداربوون .