ئێران و ڕووسیا ڕێککەوتنێکی هاوبەش واژۆ دەکەن

ئاڤا نیوز

 

لەدوای سەردانی مەسعود پزیشکیان، سەرۆککۆماری ئێران بۆ ڕووسیا، مۆسکو و تاران ڕێککەوتنامەیەکی ستراتیژی هاوبەشیان واژۆکرد.

 

وێنە گەورەکە: ڕۆژی 17-1-2025 مەسعود پزیشکیان، سەرۆککۆماری ئێران، بە سەردانێک گەیشتە مۆسکۆ و لەگەڵ ڤلادیمێر پووتین، سەرۆکی ڕووسیا کۆبوویەوە، بەهێزکردنی پەیوەندییە سیاسی، ئابووری و سەربازییەکان پرسی سەرەکی کۆبووەنەوەکانی نێوان هەردوولا بوو.

لێدوانی فەرمی: مەسعود پزیشکیان، سەرۆککۆماری ئێران ڕایگەیاند،  ڕووسیا پشتیوانییەکی سەرەکی ئێرانە و هیوادارین بتوانین پەرە بە پەیوەندییە ئابووری و بازرگانییەکانمان بدەین و ئەو ڕێککەوتنەی لەنێوان تاران و مۆسکۆدا واژۆ دەکرێت لاپەڕەیەکی نوێ لە پەیوەندییە بازرگانییەکانی نێوانمان دەکاتەوە.

 

زانیاریی زیاتر: بە واژۆکردنی ڕێککەوتنێکی هاوبەشیی ستراتیژیی نێوان ڕووسیا و ئێران کە بۆ ماوەی 20 ساڵە،  پەیوەندییە سەربازییەکانی نێوانیان قووڵتر دەکاتەوە،  پێدەچێت وڵاتانی ڕۆژئاوا نیگەران بکات، پووتینیش دەڵێت، مۆسکۆ ئامادەیە  لەبواری ئەتۆمی هاوکاریی زیاتری ئێران بکات.

 

کاریگەریی و لێکەوتەکان: ئەم سەردانەی پزیشکیان بۆ ڕووسیا چوار ڕۆژ بەر لەدەستبەکاربوونی دۆناڵد ترەمپ وەک سەرۆکی ئەمریکایە، کە چاوەڕوان دەکرێت سیاسەتی 'زۆرترین فشار' بەسەر ئێراندا بسەپێنیت، وتەبێژی کرێملن دەڵێت، سەردانی پزیشکیان بۆ مۆسکۆ ماوەیەکی زۆرە پلانی بۆدانرابوو، سەردان و ڕێککەوتنەکە هیچ پەیوەندی بە ترەمپەوە نییە.