داڤۆس 2025: وەرچەرخانی هەرێمی کوردستان لە ئاستی جیهانیدا

هەرێمی کوردستان لە کۆڕبەندی ئابووریی داڤۆس 2025 بە سەرکردایەتیی سەرۆکوەزیران مەسرور بارزانی، وەک کیانێکی گرنگ و سەربەخۆ دەرکەوت کە توانای مامەڵەکردن و کاریگەری لە ئاستی نێودەوڵەتیدا هەیە. ئەم بەشدارییە دەرخەری ئیرادەی سیاسی و ئابووریی هەرێمی کوردستان بوو بۆ دەرچوون لە چوارچێوەی چاوەڕوانی و پەراوێزخستن و گەیشتن بە ئاستێک کە بتوانێت لە ڕەوتی گۆڕانکارییە جیهانییەکان کاریگەر بێت.

 

سەرەڕای ئاستەنگە بەردەوامەکانی پەیوەندیدار بە بودجە و مافە دەستوورییەکان لە چوارچێوەی عێراقدا، هەرێمی کوردستان سەلماندی کە توانای گونجان و بەرگریکردن لە بەرژەوەندییەکانی هەیە. لە کۆنفرانسی داڤۆس، هەرێم سەرنجی کۆمپانیا و وەبەرهێنەرانی نێودەوڵەتی ڕاکێشا بۆ دەرفەتە ئابوورییەکان، بەتایبەت لە بوارەکانی وزە، کشتوکاڵ، گەشتوگوزار و تەکنەلۆژیا. ئامانجی سەرەکی ئەم بەشدارییە دروستکردنی پردی پەیوەندی، بەهێزکردنی دیپلۆماسی ئابووری، نیشاندانی توانا و لێهاتوویی هەرێمی کوردستان وەک ناوچەیەکی سەقامگیر و بەهێز بوو.

 

بەشداری لە داڤۆس دەرخەری ستراتیژیەتێکی نوێی هەرێمی کوردستان بوو کە تێیدا سەربەخۆیی ئابووری، پەرەپێدانی زێدەخوازانەی ژێرخان و کارکردن بۆ دابینکردنی داهاتوویەکی گەشەپێدراو بۆ هاووڵاتیان لەسەروو هەموو بایەخەکانەوەیە. هەرێمی کوردستان نیشانی دا کە ئیدی ناتوانرێت وەک ناوچەیەکی لاواز و پشتگوێخراو سەیری بکرێت، بەڵکو کیانێکی خاوەن پڕۆژە و ئیرادەی گەشەکردنی بەردەوامە.