داوا دەکرێت خانەنشینکردنی مامۆستایانی زانکۆ دوابخرێت

 

ئاڤا نیوز

وەزارەتی دارایی هەرێمی كوردستان سەرقاڵی ئامادەكردنی لیستی ناوی ئەو كەسانەیە كە خانەنشینبوون دەیانگرێتە و لە ڕۆژانی داهاتوو ڕەوانەی بەغدا ئەكرێت.

چیرۆكی سەرەكی: حکومەتی عێراق داوای لە هەرێمی کوردستان کردووە تەمەنی خانەنشینی هاوتا بکەن، بەمەش ئەم مانگە هەزاران فەرمانبەر بەیەکەوە خانەنشین دەکرێن، بەگشتی فەرمانبەرانی ئاسایی سێ تەمەن دەگرێتەوە، 60 و 61 و 62 ساڵ.

لێدوانی فەرمی: سەردان حوسێن، سەرۆكی لقی هەولێری كۆمەڵەی خانەنشینان بە ئاڤای ڕاگەیاند: تیمە تایبەتەكان بە شەو و ڕۆژ سەرقاڵن تاوەكو درەنگانی دوێنێ شەو ناوی 30 هەزار مووچەخۆر بۆ خانەنشینی تۆمار كراون، کە سەرجەمیان 37 هەزار کەسن.

زانیاریی بەدەستهاتوو: بەپێی زانیارییەكانی ئاڤا، هەرێمی كوردستان داوا لە بەغدا دەكات ناوی مامۆستایانی زانكۆ لە لیستەكە دەربهێنرێن و یاسای تازە نەیانگرێتەوە، لە تەمەنی 63 ساڵی خانەنشین بكرێن نەوەک لە 60 ساڵی، بۆئەوەی بە جارێک تووشی ئەزمە نەبن و کێشە دروست نەبێت.

ئەمەش بزانە: هەولێر بەهۆی ئەوەی پایتەختە و سەرجەم وەزارەتەكان و سەرۆكایەتییەكان و ژمارەیەكی زۆر بەڕێوەبەرایەتیی گشتی و فەرمانگە لەم شارەن، لەو 37 هەزار مووچەخۆرە زۆرینەیان لە سنووری پارێزگای هەولێرن.