لیستی مووچە لە 48 کاتژمێری داهاتوودا ئامادە دەکرێت

ئاڤا نیوز 

 

لە 48 کاتژمێری داهاتوودا لیستی مووچە و خانەنشینان ئامادە دەکرێن، دواتر شاندی کوردستان دەچێتە بەغدا و ڕێککەوتنێکی نوێ لەبارەی مووچە و شایستە داراییەکان دەکەن

 

وێنە گەورەکە: کۆبوونەوەی هەردوو تیمی تەکنیکی وەزارەتی دارایی عێراق و بەڕێوەبەرایەتیی خانەنشینی عێراق لەگەڵ تیمی تەکنیکی وەزارەتی دارایی دارایی و ئابووریی هەرێمی کوردستان و یەکە ژمێریارییەکانی سەرجەم وەزارەتەکان و بەڕێوەبەرایەتی خانەنشینی کوردستان بەردەوامە، ئەمڕۆش دانیشتن و کۆبوونەوەیان بەردەوام دەبێت.

 

زانیاریی بەدەستهاتوو: هەردوو تیمەکە یاخود شاندەکەی عێراق لە ڕۆژانی ڕابردوودا سەردانی وەزارەتی دارایی کوردستان و یەکەی ژمێرکاری کوردستانیان کردووە، بە بەشداری شاندی باڵای کوردستان و وەزارەتی داراییش کۆبوونەوەیەکیان کردووە، لەگەڵ بەڕێوەبەرایەتی خانەنشینی و یەکەی ژمێرکاری وەزارەتەکانیش بەردەوام لەسەر خەتن، بە ئامانجی چوار شت، ئەمانیش:-

یەکەم: ئامادەکردنی لیستی مووچەی مانگی یەک بە شێوازی ئەلیکترۆنی و سیستەمی پەیرۆڵ، کە دەبێتە بنەما بۆ سەرجەم مانگەکانی ئەمساڵ.

دووەم: ئامادەکردنی لیستی خانەنشینانی نوێ کە 37 هەزار فەرمانبەر دەگرێتەوە و ئەم مانگە خانەنشین دەبن. 

سێیەم: ئامادەکردنی لیستی خانەنشینانی ئەمساڵ کە ڕۆژی 31-12-2024 خانەنشین دەبن، واتە کۆتایی ئەمساڵ و ئەم لیستە بە جیاواز ئامادە دەکرێت.

چوارەم: ئامادەکردنی تەرازووی پێداچوونەوە (میزان موراجەعە)ی مانگی 12ی ساڵی ڕابردوو کە خەرجییەکانی وەزارەت و فەرمانگەکانی حکومەت لەخۆدەگرێت.

لەلایەکی دیکەوە: جگە لەم چوار خاڵە داواکارییەکی دیکەش هەیە، ناوی ئەو خانەنشینانە لە لیستی مووچەی گشتی خانەنشینان دەربهێنرێت کە ژمارەی کەسی بێهاوتا واتە یو پی ئێنیان نەکردووە.

 

ئەوەش بزانە: بڕیار بوو ڕۆژی شەممەی ڕابردوو هەموو لیستەکان و داواکارییەکانی بەغدا ئامادە بکرێن و ئەمڕۆ یەکشەممە شاندی کوردستان بچێتەوە بەغدا و کۆبوونەوە لەگەڵ تەیف سامی بکەن، بڕیار لەبارەی خەرجکردنی مووچە بدەن و ئەم بابەتە ببڕێتەوە، بەڵام ئاڤا زانیویەتی بەهۆی داواکارییە زۆرەکانی بەغدا نەتوانراوە هەموو شتێک ئامادە بکرێت و چوونی شاندەکە دواکەوتووە.

 

قووڵتر: ئاڤا زانیویەتی لە 48 کاتژمێری داهاتوودا سەرجەم لیست و داواکارییەکان ئامادە دەکرێن، ناوەڕاستی ئەم هەفتەیە شاندی کوردستان بۆ دووەمجار دەچێتەوە بەغدا، گفتوگۆ لەبارەی ڕێککەوتنێکی نوێ دەکەن.