دادگای عێراق سزای لەسێدارەدان بەسەر نۆ بازرگانی ماددەی هۆشبەردا دەسەپێنێت

ئاڤانیوز

دادگای ناوەندی تاوانەکان لە بەغدا بەتۆمەتی بازرگانییکردن بە ماددەی هۆشبەر و دەستبەسەرداگرتنی 186 کیلۆگرام لەکاتی دەستگیرکردنیاندا، سزای لەسێدارەدانی بەسەر نۆ کەسدا سەپاند.

وێنە گەورەکە: ئامارەکانی بەکارهێنان و بازرگانیکردن بە ماددەی هۆشبەر لە عێراق زیادیانکردووە، بەگوێرەی ئامارەکانی وەزارەتی ناوخۆی عێراقیش ساڵی ڕابردوو دەستبەسەر شەش تۆن و 183 کیلۆگرام ماددەی هۆشبەردا گیراوە.

ڕاگەیێنراوی فەرمی: دادگای ناوەندی تاوانەکان لە ڕاگەیێنراوێکدا باسی لەوەکردووە، ئەو 186 کیلۆگرام ماددە هۆشبەرەی دەستیبەسەردا گیراوە پێکهاتووە لە (کاپتاگۆن - ئەمفیتامین و کافین)، بازرگانەکان ویستوویانە بە بەکارهێنەرانی ماددەی هۆشبەرەکانی بفرۆشن.

ئەوەشی خستووەتەڕو، لەسەر ئەو بنەمایە و پاڵپشت بە بڕگە و ماددەکانی هەردوو یاسای ماددە هۆشبەرەکان و سزادانی عێراق، سزای لەسێدارەدانیان بەسەردا سەپێنراوە.