چەند لایەنێکی شیعە بۆ دەنگدان لەسەر بودجە خۆیان یەکلایی دەکەنەوە

ئاڤا نیوز

 

هەر یەکە لە فراکسیۆنەکانی حیکمە، نەسڕ، فوڕاتەین لە هاوپەیمانی شیعەکان هەڵوێستی خۆیان سەبارەی بە دەنگدان بە هەمواری یاسای بودجە ڕادەگەیەنن.

 

چیرۆکی سەرەکی: بڕیارە ڕۆژی یەکشەممە پەرلەمانی عێراق کۆببێتەوە و یەکێک لە بڕگەکانی کۆبوونەوەکە دەنگدان دەبێت بە هەمواری یاسای بودجەی عێراق، کە تیایدا باس لە پرسی هەناردەکردنەوەی نەوتی هەرێمی کوردستان کراوە،  لەو بارەیەوە فراکسیۆنە کوردستانییەکان یەک دەنگن و وردە وردە فراکسیۆنەکانی دیکەی پەرلەمانیش پاڵپشتی خۆیان بۆ پڕۆژە یاساکە ڕادەگەیەنن.

 

لێدوانی فەرمی: محەممەد حوسەینی، ئەندامی مەکتەبی سیاسی ڕوەتی حیکمە کە عەممار حەکیم سەرۆکایەتی دەکات بە ئاڤا میدیای ڕاگەیاند: لە پێناو بەرژەوەندی گشتیی فراكسیۆنەكەمان لە دانیشتنی ڕۆژی یەكشەممەی داهاتوو دەنگ بە هەمواری یاسای بودجە دەدات. 

 

باکگراوند: پێشتر هەردوو فراکسیۆنی ڕەوتی فوراتەینی پارتەکەی سەرۆکوەزیران محەممەد شیاع سوودانی و هاوپەیمانی نەسر بەسەرۆکایەتی حەیدەر عەبادی بڕیاریاندا لە دانیشتنی ڕۆژی یەكشەممەی داهاتوو دەنگ بە هەمواری یاسای بودجە بدەن.

 

لەلایەکی دیکەوە: دەوڵەتی یاسا و بەشێکی دیکەی هاوپەیمانیی چوارچێوەی هەماهەنگی تاوەکو ئێستا لە هەڵوێستەکانیان ساردن و هێشتا خۆیان یەکلایی نەکردووەتەوە.