خانەنشینە پلە تایبەتەکان مووچەی مانگی یەک بە هاوتاکراوی وەردەگرن

ئاڤا نیوز

پرۆسەی هاوتاکردنی مووچەی نزیکەی دوو هەزار خانەنشینی پلە تایبەت لە دهۆک و هەولێر تەواو بووە، تەنیا هی پەرلەمانتارەکان ڕاگیراوە و ئەم مانگە هاوتای بەغدا نەکراوە.

وێنە گەورەکە: پرۆسەی هاوتاکردنەکە بە گوێرەی یاسای ژمارە 9ـی ساڵی 2014ـیە، خزمەتی زیاتر و بڕوانامە ڕۆڵ دەبینێت، بەڵام بڕوانامە بۆ مردوو هەژمارناکرێت، بەمەیش مووچەی بەشێکیان کەمدەبێتەوە.

زانیاریی تایبەت: سەرچاوەیەکی باڵا لە بەڕێوەبەرایەتی گشتی خانەنشینی هەرێمی کوردستان بە ئاڤای گوت، "سەرجەم خانەنشینە پلە تایبەتەکان جگە لە پەرلەمانتاران کە بەبڕیارێک هاوتاکردنیان بە عێراق وەستاوە، هاوتای عێراق کراون و ئەم مانگە مووچە بە هاوتاکراوی وەردەگرن".

هۆکارە زانراوەکان: هۆکاری ڕاگرتنی هاوتاکردنی مووچەی پەرلەمانتار بە گوێرەی ئەو زانیارییانەی ئاڤا لە بەڕێوەبەرایەتی گشتی خانەنشینی هەرێمی کوردستان وەریگرتووە، بۆ ئەوە دەگەڕێتەوە کە پەرلەمانتار هەڵبژێردراوە، بەڵام وەزیر و پلە تایبەتەکانی دیکە لە وەزیفەدا بوون بۆیە لە مووچەی مانگی یەک هاوتا نەکراوە.