پارێزگاری خانەنشینبووی هەڵەبجە بۆ خەرجکردنی مووچەی فەرمانبەرانی دەگەڕێتەوە سەر ئەرکەکەی

ئاڤا نیوز

بەهۆی خانەنشینبوونی پارێزگاری هەڵەبجە و جێگرەکەی، کێشە بۆ دابەشکردنی مووچەی ژمارەیەک فەرمانبەر لە پارێزگای شارەکە دروست بوو، بەمەبەستی واژۆ کردن لەسەر خەرجکردنی مووچەی فەرمانبەرانی پارێزگا،  ئەمڕۆ پارێزگاری هەڵەبجە گەڕاوەتەوە سەر ئەرکەکەی.

وێنە گەورەکە: مانگێکە پارێزگای هەڵەبجە لە بۆشایی یاساییدایە بەهۆی خانەنشینبوونی پارێزگار و جێگرەکەی کاروباری هاووڵاتیان ڕاگیراوە، ماوەی سێ ڕۆژە مووچەی مانگی یەکی وەزارەتی ناوخۆ دابەشکراوە، بەڵام لەبەر نەبوونی واژۆی پارێزگار کارمەندانی پارێزگا مووچەکانیان وەرنەگرتووە.

زانیاریی تایبەت: بەپێی بەدواداچوونی ئاڤا، بەیانی ئەمڕۆ چوارشەممە، ئازاد تۆفیق، پارێزگاری خانەنشینبووی هەڵەبجە گەڕاوەتەوە سەر ئەرکەکەی بۆ واژۆکردن لەسەر خەرجکردنی مووچەی فەرمانبەرانی ناو پارێزگا کە ژمارەیان 70 کەسە، دواتر ئەرکەکەی جێدە‌هێڵێت.

ئەوەی پێویستە بیزانیت: دیاریکردنی شوێنگرەوەیەک بۆ شوێنی ئازاد تۆیق، لەڕێگەی نووسراوێکی وەزارەتی ناوخۆ دەبێت بۆ ئەنجوومەنی وەزیران، کە تێیدا کە واژۆ لەسەر کەسێک دەکرێت بۆ ئەوەی ئەرکەکەی ڕابپەڕێنێت، یان دانانی پارێزگاری نوێ کە پۆستەکە پشکی یەکێتییە و تاوەکو ئێستا لەسەر دیاریکردنی کەسێک یەکلایی نەبوونەتەوە.