نەخۆشخانە ئەهلییەکان پابەند دەکرێن دەرچووانی کۆلێژی پزیشکی دابمەزرێنن

ئاڤا نیوز

 

پەرلەمانی عێراق خوێندنەوەی یەكەم بۆ پێشنیازە یاسای نەخۆشخانە ئەهلییەكان دەكات، كە لە بڕگەیەكی یاسەكەدا نەخۆشخانەكان پابەند دەكات بە دامەزراندنی دەرچووانی كۆلێژ و بەشە پزیشكییەكان.

وێنە گەورەكە: نووسینگەی ڕاگەیاندنی سەرۆكایەتیی پەرلەمانی عێراق خشتەی كاری ڕۆژی دووشەممە 17-2-2025ـی بڵاوكردووەتەوە، بەگوێرەی كارنامەكەش، لە تەوەری سێیەمدا خوێندنەوەی یەكەم بۆ پێشنیازە یاسای نەخۆشخانە تایبەتەكان لە عێراق دەكرێت.

 

ڕاگەیێنراوی فەرمی: بەپێی ڕاگەیێنراوەكەی پەرلەمانی عێراق، دانیشتنەكانی ڕۆژی دووشەممە لە کاتژمێر 01:00ـی دوای نیوەڕۆ دەستپێدەكات و تیایدا گفتوگۆ و خوێندنەوە بۆ شەش پڕۆژە و پێشنیازە یاسا دەكرێت، لەنێویشیاندا یاسایێك بۆ ڕێكخستنەوەی كاروباری نەخۆشخانە ئەهلییەكان.

 

لێدوانی فەرمی: دكتۆر ماجد شنگالی، سەرۆكی لیژنەی تەندروستی و ژینگە لە پەرلەمانی عێراق لەمیانی بەشداریكردنی لە كۆنفرانسێكی تەندروستی ڕایگەیاند، پێشنیازە یاسای نەخۆشخانە ئەهلییەكان لە 8 ماددە پێكهاتووە و ماوەیەكی زۆرە لەلایەن لیژنەكەیانەوە كاری لەسەر دەكرێت، لەپێناو هەماهەنگیكردن لەگەڵ كەرتی تایبەت بۆ پێشخستنی سێكتەری تەندروستی.

 

ئەوەی پێویستە بیزانیت: شنگالی ڕوونیشی كردەوە، ئێستا لە عێراق زیاتر لە 150 نەخۆشخانەی ئەهلی هەن كە بوونەتە هاوكارێكی باش بۆ كەرتی حكومی و ڕۆڵیان هەبووە لە كەمكردنەوەی بارگرانی لەسەر نەخۆشخانە حكومییەكان.

 

هۆكارە زانراوەكان: ئامانجی سەرەكی دەرچوواندنی ئەم یاسایە:

- دامەزراندنی دەرچووانی كۆلێژ و پەیمانگە پزیشكییەكانە لە نەخۆشخانە ئەهلییەكان، بەو پێیەی نەخۆشخانە حكومییەكان ناتوانن ئەو ژمارە زۆرەی دەرچووان لەخۆ بگرن.
- یاساكە بڕگەیەك لەخۆدەگرێت بە دابینكردنی كەلوپەل و پێداویستی پزیشكی بۆ نەخۆشخانە تایبەتەكان هاوشێوەی نەخۆشخانە حكومییەكان، لەپێناو كەمكردنەوەی نرخی ئەو نەخۆشخانانە بە لەبەرچاوگرتنی دۆخی بژێوی هاووڵاتیان.

 

لەلایەكی دیكەوە: ساڵح زەمد، ڕاوێژكاری سەرۆكوەزیرانی عێراق بۆ كاروباری تەندروستی ڕایگەیاند، حكومەت لە كارنامەی خۆیدا بایەخێكی تایبەت بە پەرەپێدانی كەرتی تەندروستی دەدات، بەو پێیەی كەموكوڕی لە ژمارەی نەخۆشخانە حكومییەكان هەیە و حكومەت مەبەستییەتی ئەم بۆشاییە بە نەخۆشخانە ئەهلییەكان پڕبكاتەوە، هاوشێوەی وڵاتانی جیهان كەوا نەخۆشخانە تایبەتەكان نزیكەی 60%ـی سەرجەم نەخۆشخانە و دامەزراوە تەندروستییەكانی وڵات پێكدەهێنن.