سبەی دەست بە دابەشکردنی لیستی بریکارەکانی خۆراک دەکرێت

ئاڤا نیوز

دابەشکردنی لیستی بریکارەکانی خۆراک لەلایەن وەزارەتی بازرگانی و پیشەسازییەوە دەستپێدەکات.

وێنە گەورەکە: بڕیارە ڕۆژی 20-2-2025، دەست بەپێدانی لیستی بریکارەکانی خۆراک لە هەرێمی کوردستان بکرێت.

لێدوانی فەرمی: نەوزاد شێخ کامیل، بەڕێوەبەری گشتیی لە وەزارەتی بازرگانی و پیشەسازی حکومەتی هەرێمی کوردستان، بە ئاڤا میدیای ڕاگەیاند:

- لە سبەی پێنجشەممەوە مۆڵەتی دابەشکردنی بەشە خۆراکی نیوەی یەکەمی 2025مان هەیە و دەست بە دابەشکردنی دەکەین.

- ئەو بەشەخۆراکەی لە ماوەکانی ڕابردوو بەسەر هاووڵاتیاندا دابەشکرا، بەشەخۆراکی نیوەی دووەمی ساڵی 2024 بوو.

زانیاریی زیاتر: هەر هاووڵاتییەک سێ کیلۆ برنج، لیترێک ڕۆن، 250 گرام نیسک، 250 گرام لەتکە نۆک، یەک کیلۆ شەکر، 100 گرام دۆشاوی تەماتە و نۆکی پێ دەدرێت.

ئەمەش بزانە: وەزارەتی بازرگانی و پیشەسازی ئامادەکارییەکانی بۆ بە ئەلیکترۆنیکردنی فۆرمی خۆراک دەستپێکردووە، بە وتەی نەوزاد شێخ کامیل "بە ئەلیکترۆنیکردنی فۆرمی خۆراک، سێ تاوەکو چوار مانگی پێویستە".