خانەنیشینانی نوێ سێ مووچە بەیەکەوە وەردەگرن

ئاڤا نیوز

ئاڤا زانیاریی نوێی دەستکەوتووە لەسەر ئەو فەرمانبەرانەی کە بە یاسای نوێی خانەنشینی لەسەرەتای ئەمساڵەوە خانەنشین بوون، بەشێکی زۆریان بۆ مووچەی مانگی سێ، سێ مووچە پێکەوە وەردەگرن.

وێنە گەورەکە: ڕۆژانە سەدان فەرمانبەر لە فەرمانگەکانیان نووسراوی دەست لەکارهەڵگرتن دەکەن و مووچەکانیان دەگوازرێتەوە سەر خانەنشینی، لە بەڕێوەبەرایەتی گشتیی خانەنشینی دوای وردبینی و پێداچوونەوە لەنێو لیستی مووچە وەک خانەنشین جێگیر دەکرێن.

زانیاریی تایبەت: سەرچاوەیەک لە خانەنشینی هەرێمی کوردستان بە ئاڤا میدیای گوت، "لیستی مووچەی مانگی دوو دوێنی چوارشەممە تەواوکراوە، بەهۆی ئەوەی فەرمانبەرانی سێ تەمەنەکە (60، 61 و 62) ساڵ، مامەڵەی گواستنەوەی مووچەکانیان تەواو نەبووە، بۆیە مووچەی مانگی دووش وەرناگرن لە مووچەی مانگی سێ ئەوانەی تەواو دەبن دەخرێنە نێو لیست و  سێ مووچە بەیەکەوە وەردەگرن".

لەلایەکی دیکەوە: ئەو سێ تەمەنەی لەو ماوەیە خانەشین دەبن ژمارەیان زیاترە لە 25 هەزار کەس، ئەگەر سەرووی 25 ساڵ خزمەتیان هەبێت دەبێت 18 مووچەیان بۆ خەرج بکرێت کە شەشیان مووچەی بنەڕەتی و 12 ـیان مووچەی خانەنشین بوونیانە.