سێ گەریلای پەکەکە لە سنووری دێرەلووک دەکوژرێن

ئاڤا نیوز

شەڕ و ڕووبەڕووبوونەوەکانی نێوان گەریلاکانی پەکەکە و سوپای تورکیا لە ناوچە سنوورییەکانی هەرێمی کوردستان بەردەوامە، تاوەکو ئێستاش چەندین سەرکردەی دیاری پەکەکە بە درۆن کراونەتە ئامانج.

چیرۆکی سەرەکی: ئەمڕۆ هەینی 2025-02-21، سێ گەریلای پەکەکە لە گوندی گۆهەرز لە سنووری ناحیەی دێرەلووک، کەوتنە بۆسەی سەربازانی سوپای تورکیا و دوای شەڕێکی سەخت، هەرسێ گەریلاکە کوژراون، دواتر سەربازانی سوپای تورکیا ناوچەکەیان جێهێشت.

لێدوانی فەرمی: ئەحمەد تاهیر، موختاری گوندی گۆهەرز بە کاروان عەلی، پەیامنێری ئاڤا میدیای ڕاگەیاند، "لەگەڵ گۆڕانی کەشوهەوا، هاوکات دروستبوونی تەم و مژێکی زۆر و بارینی بەفر لە ناوچە شاخاوییەکان، گەریلاکانی پەکەکە هەوڵ دەدەن شوێنەکانیان بگۆڕن و لە گوندەکان نزیک دەبنەوە، ئەمەش خەڵکی سنوورەکەی بێزار کردووە".

گوتیشی، سەربازانی سوپای تورکیا بە دوو ئۆتۆمبێل لە گوندەکەدا بۆسەیان بۆ گەریلاکانی پەکەکە دانابووەوە.