چین باجی گومرگی دەخاتە سەر بەرهەمە خۆراکییەکانی کەنەدا

ئاڤا نیوز

 

چین باجی گومرگی بەسەر بەرهەمە خۆراکییە هاوردەکانی کەنەدا دەسەپێنێت، ئەمەش وەک کاردانەوەیەک لە دژی ئەو باجانەی پێشووتر کەنەدا بەسەر چین دا سەپاندی.

 

ڕاگەیێنراوی فەرمی: وەزارەتی بازرگانیی چین ڕایگەیاند، چین باجی گومرگی بە ڕێژەی 100٪ بەسەر بەرهەمە خۆراکییەکان و 25٪ بەسەر بەرهەمە ئاوییەکانی گۆشتی هاوردەی وڵاتی کەنەدا بۆ وڵاتەکەی دەسەپێنێت.

 

زانیاریی زیاتر: بڕیارەکە لە 20ئادار دەچێتە بواری جێبەجێکردنەوە، ئەمە بەگوێرەی ڕاگەیێنراوەکەی وەزارەتی بازرگانیی چین. 

 

ئەوەی پێویستە بیزانیت: لە مانگی 8ی ساڵی ڕابردوو، کەنەدا باجی گومرگی خستە سەر بەرهەمی کارەبایی و ئۆتۆمبێلەکان کە لە چینەوە هاوردە دەکرێت، هاوتەریب لەگەڵ ڕێوشوێنەکانی ئەمریکا بۆ سنووردارکردنی ڕۆیشتنی ئەم بەرهەمانەی چین بۆ ناو بازاڕەکانی ئەمریکای باکوور.

 

باکگراوند: ماوەی ساڵانێکە پەیوەندییەکانی نێوان کەنەدا و چین ئاڵۆز بووە، دوای ئەوەی کەنەدا لە ساڵی 2018 بەرپرسێکی باڵای کۆمپانیای هواوی دەستگیرکرد، ئەمەش وایکرد پەکین دوو هاوڵاتی کەنەدی دەستبەسەر بکات.