ئۆكراینا: سەرووی 885 هەزار سەربازی ڕووسیامان كوشتووە و برینداركردووە

ئاڤا نیوز

سوپای ئۆكراینا ڕایدەگەیێنێت، لەماوەی 24 كاتژمێری ڕابردوودا هەزار و 180 سەربازی ڕووسیایان كوشتووە و بریندار كردووە. سوپای ئۆکراینا دەشڵێت، "ژمارەی ئەو سەربازە ڕووسیانەی لەماوەی سێ ساڵی شەڕی نێوان ئەو دوو وڵاتە كوژراون و برینداربوون، گەیشتووەتە 885 هەزار و 130 سەرباز".

وێنە گەورەكە: جەنگی نێوان ڕووسیا و ئۆكراینا سێ ساڵی تێپەڕاندووە، جگە لە كوژران و برینداربوونی سەدان هەزار سەرباز لە هەردوو وڵات، زەرەر و زیانی زۆری ماددیش بەر ژێرخانی ئابووری و سەربازی كەوتووە، لەبارەی ئاماری زەرەر و زیانەكانی شەڕەكە هەردوو وڵات، ئاماری جیاواز بڵاودەكەنەوە.

 

ڕاگەیێنراوی فەرمی: بەپێی بەیاننامەیەكی ئەركانی گشتیی هێزە چەكدارەكانی ئۆكراینا كە لە ئاژانسی هەواڵی نیشتمانی ئۆكراینا 'ئۆكراینفۆرم' بڵاوكراوەتەوە، هێزەكانی ئۆكراینا لە سەرەتای جەنگەوە تائێستا 10 هەزار و 274 تانكیان لەناوبردووە، هەروەها 21 هەزار و 360 زرێپۆشی شەڕكەر و 24 هەزار و 206 سیستمی تۆپخانە، هەزار و 310 سیستمی مووشەکی فرەهەڵدان و هەزار و 101 سیستمی بەرگریی ئاسمانی تێکشکێنراون.

 

زانیاریی زیاتر: هەر لەبارەی زیانەکانی ڕووسیاوە، سوپای ئۆكراینا دەڵێت، 370 فڕۆکەی جەنگی، 331 هێلیکۆپتەر، 28 هەزار و 362 فڕۆکەی بێفڕۆکەوان، 3 هەزار و 120 مووشەکی کروز، 28 کەشتی جەنگی، یەک ژێردەریایی، 39 هەزار و 933 ئۆتۆمبێل و تانکی سووتەمەنی، هەروەها سێ هەزار و 773 یەکەی کەرەستەی تایبەت لەناوبراون.