لە سنووری وەرتێ كەسێك بەهۆی تەقینەوەی مین گیانی لەدەست دا

ئاڤا نیوز

 

هاووڵاتییەكی دانیشتووی ئیدارەی سەربەخۆی سۆران لە سنووری ناحیەی وەرتێ بەهۆی تەقینەوەی مینێكی كۆنەوە گیانی لەدەست دا.

 

ڕاگەیێنراوی فەرمی: پۆلیسی بەرگریی شارستانیی سۆران ڕایگەیاند: هاووڵاتییەك بە ناوی محەممەد حەسەن، دانیشتووی قەزای ناوەندی سۆران، تەمەن 55 ساڵ، كە بۆ مەبەستی هێنانی گژوگیای بەهاری چووەتە كوێستانەكانی سنووری ناحیەی وەرتێ، بەر مین كەوت و بەو هۆیەوە گیانی لەدەست دا.

 

زانیاریی زیاتر: تەرمی هاووڵاتییەكە لەلایەن تیمێكی هاوبەشی بەرگریی شارستانی و پۆلیسی دارستان و تەندروستیی وەرتێ لە شاخ هێنرایەوە و ڕەوانەی پزیشكی دادی سۆران كرا.

 

باكگراوند: لەگەڵ هاتنی وەرزی بەهار بەشێك لە هاووڵاتییان بەتایبەت ناوچە دوورەدەستەكان بۆ چنینەوەی گژوگیای بەهار ڕوو لە بەرزایی و ناوچە شاخاوییەكان دەكەن، بەڵام بەهۆی مینڕێژكردنی ناوچە شاخاوی و سنوورییەكان لەلایەن ڕژێمی ڕووخاوی بەعسەوە، ساڵانە مین بە چەندین كەسدا دەتەقێتەوە و بەو هۆیەوە گیان لەدەست دەدەن یاخود بریندار و كەمئەندام دەبن.