تووڕەیی سابیئەی مەندائییەکانی عێراق زیاتر دەبێت

ئاڤا نیوز 

دوای ئەوەی هێرشی چەکداری کرایە سەر پەرستگەیەکی پێکهاتەی سابیئەی مەندائی لە عێراق، تووڕەیی پەیڕەوانی ئەو ئایینزایە زیاتر دەبێت و حکومەتی عێراق بە بەرپرسیار لە پاراستنی گیانیان دادەنێن. 

چیرۆکى سەرەکی: بەرەبەیانی ڕۆژی 08-03-2024، لە پارێزگای میسان لەلایەن چەند چەکدارێکەوە هێرش کرایە سەر پەرستگەیەکی سابیئەی مەندائی و دوو لە پاسەوانەکانی ئەو پەرستگەیە بە سەختی بریندار کران. 

ڕاگەیێنراوی فەرمی: سەرۆکایەیی پێکهاتەی سابیئەی مەندائی ئەنجوومەنی گشتیی رووحانیی ئەو پێکهاتەیە لە ڕاگەیێنراوێکدا دەڵێن: حکومەتی عێراق بە بەرپرسیار لە پاراستنی گیانی پەیڕەوانی سابیئەی مەندائی دەزانین، داوا دەکەین بە زووترین کات بکەرانی ئەو کارە دەستگیر بکرێن.

 
لەلایەكی دیكەوە: لێژنەی ئامادەکاریی کۆبوونەوەی مەندائیی دیموکراتەکان لە کەنەدا دەڵێت: لایەنێکی باڵادەست ئەو هێرشە ترسنۆکانەی کردووەتە سەر پەرستگەیەکمان، ئەمە کاریگەریی لەسەر پێکەوەژیان و برایەتی هەیە لە عێراق. 

باکگراوند: سابیئەی مەندائییەکان پەیڕەوی ئایینی پێغەمبەر یەحیا دەکەن، لە عێراق ژمارەیان بۆ خوار 15 هەزار کەس کەمبووەتەوە، لە پارێزگاکانی میسان، کەرکووک و زیقار نیشتەجێن.