هەرفینا جڤاکی… ئێک

چەوا جڤاک دهەرفن… د ناڤبەرا گوهۆڕین و هەرفینێ دا دێ چەوا هێتە ژێک ڤاڤارتن؟
مرۆڤ (تاک) یەکا سەرەکی یا پێکئینانا جڤاکیە، ژهەڤگرتنا دوو تاکان بۆ پێکئینانا خێزانەکی پێناسەیا جڤاکی پێکدهێت. ب کورتی تاک سەنتەرێ جڤاکی یە، لێ هەر جڤاکەکی تایبەتمەندی و ناسنامەیێن خۆ یێن جودا هەنە و هەڤپشکیێن وان د مرۆڤایەتیێ دا زۆرترن.

ئەز نابێژم جڤاکێ کوردی چونکی جڤاکێ کوردستانێ یە هژمارەکا پۆلینان بۆ ناسناما ژ “تاک، خێزان، بنەمال، گوند، عەشیرەت، باژێڕ، یەکەیێن ئیداری” یان ل سەر بنیاتێ “ڕەگەز، تەمەن، کار و پیشە، ئاستێ زانستی، حەزوئارەزوو” ژ ناسنامەیێن بچیک و مەزن دچوارچووڤێ نشتیمانەکی دا پێک دهێن. ئەو نشتیمان پارچەیەکا ئاخێ بیت یان کۆمەکا پارچێن ئاخێ وەکی کوردستانا مە، گەلەک فاکتەر هۆکارن بۆ دەستنیشانکرنا ناسنامێن جڤاکی هەنە.

مادەم هەڤپشکی هەنە وەسان هەڤرکی ژی یا هەی ل سەر ئاستێن “تاک” هەتا دگەهیتە ئاستێ دەولەتان و د ڤان سەد سالێن بوری دا هەڤڕکیا جیهانی دوو شەڕێن جیهانی دەربازکرن و ب ڕەنگەکێ ژ ڕەنگان شەڕ دەربازی قۆناغەکا نوو بوویە ژ شەڕێ سار و ئەتۆمی بەرەف شەڕێ زانیاریان.

گەلەک جاران ب نموونە دبێژین “زانیاری_پێزانین” یان “ئینفورماسیۆن” وەکی ئەرزاقی نە، هندەک دکەنە پەلیک، هندەک ژی دکەنە ترشک.

چ بێژین شەڕ یان ئاشتی هەردوو د قۆناغا پێشکەفتنا گۆپیتکی یا تەکنۆلۆژی دهێنەکرن، د سەردەمێ جیهانگیریا تەکنۆلوژی دا پرۆسەیا هەرفتنا جڤاکان یا دەستپێکری ژ چەکێ تەکنۆلۆژی هەتا دگەهیتە خلولەکرن و هەرفاندنا ناڤخۆییا جڤاکان.

دەلیڤەیێن یەکسان د تەکنولۆژیێ دا ئەگەر چ ڕێکەکا باشە بۆ بەردەستکرنا زانیاریان و پرەنسیپەکێ دیموکراسیێ یە، لێ ئاستێ تێگەهشتنێ ب یەکسانی بەرهەم نائینیت حەزا جڤاکی پتر بۆ بابەتێن فانتازی یێن د ئاستەکێ زۆرێ سادە دانە و ئەڤە بیاڤەکێ مەزنە بۆ هەرفاندنا جڤاکی.

جڤاکێ کوردستانێ ل سەر بنەمایێ ڕێز و ڕێزگرتن ئاڤابوویە و ڤێ ڕێزگرتنێ هزاران سالان ئەڤ جڤاکە زیندی هێلایە، د ناڤبەرا شەڤەک و ڕۆژەکان دا پێلەک بهێت و شەقەکێ ل ڤێ هەڤگرتنێ بدەت یا ب سەناهی نابیت و نە یا نۆرمالە و گۆهوڕینێن وێ ژی ب مەترسینە.

ئەڤ مەترسیە نە ب تنێ ل سەر ئاستێ ناڤخۆیی یان تاکی یە بەلکو شەڕەکێ دەروونی یێ ڕێکخستی و جیهانی یە. کو بیروباوەر و هزرێ دئێخیتە د مەترسیێ دا و چەوا مرۆڤێ ئاشتیخاز دروست دکەت د هەمان دەم دا مرۆڤێ توندڕەو ژی بەرهەم دئینیت.

ئایا هەرفینا جڤاکی یان هەرفاندنا جڤاکان دێ کۆمەلگەها نوو یا مرۆڤایەتیێ پێک ئینیت تێدا ئاشتی ناسناما هەڤپشکا مرۆڤایەتیێ بیت؟ مرۆڤ سنوورێن خۆ بزانن و دەربازنەکەن؟ مادیەت نەبیتە پیڤەرێ هەر تشتی هەر وەکی سەرمایەداری بەرهەم دئینیت؟ دیموکراسی سیستەمەکێ ساخلەمێ جیهانی یە؟ یان ژی دبیتە مژیلکرنا جڤاکان و بهێزکرنا ئابووری و سەرمایەداریێ؟ ڕۆلێ دەستهەلات و حکومەتان د ڤێ دا چیە؟ یان ئەڤە ژدەرڤەی دەستهەلاتا حکومەتانە و حکومرانیا تەکنۆلۆژی یە. د گۆتارێن بهێت دا دێ بەردەوام بین.