کێشەکانی نێوان دوو باڵەکەی بزووتنەوەی گۆڕان ئاڵۆزتر دەبن

 ئاڤا نیوز

گیروگرفتەکانی گۆڕانی باڵی کوردسات و باڵی زەرگەتە تا دێت ئاڵۆزتر دەبێت، کۆمیسیۆن لەبارەی کۆنفرانسەکانی دوو باڵەکە بریار دەدات.

ئەوەی پێویستە بیزانیت: کۆمسیۆنی باڵای سەربەخۆی هەڵبژاردنەکانی عێراق لەلایەک ئەنجامەکانی كۆنفرانسی رۆژی شەممەی گۆڕانی گردی زەرگەتەی هەڵوەشاندەوە، لەلایەکی دیکەوە بڕیاری دا كۆنفرانسەکەی ڕۆژی 10ی ئەم مانگەی گۆڕانی کوردساتیش دوابخرێت بۆ کاتێکی نادیار.

ڕاگەیێنراوی فەرمی: بزووتنەوەی گۆڕانی (كوردسات) لە ڕاگەیێنراوێكدا ئەوەی ئاشکرا کردووە کە بەبڕیاری ئەنجوومەنی كۆمسیاران كۆنفرانسی 10ی نیسان دواخرا.

لەلایەکی دیکەوە: سەرچاوەیەك لە بزووتنەوەی گۆڕانی گردی زەرگەتە بە ئاڤا میدیای ڕاگەیاند، كۆمیسیۆنی هەڵبژاردنەكانی عێراق ئەنجامەکانی كۆنفرانسی ڕۆژی شەممەی گردی زەرگەتەی هەڵوەشاندووەتەوە، هۆکاری هەڵوەشانەوەی ئەنجامەکانی کۆنفرانسەکەش لەبەر ئەوەیە گوایە نوێنەرانی کۆمسیۆنی باڵای هەڵبژاردنەکانی عێراق ئامادە نەبوون.

ئەوەی لەوبارەیەوە دەوترێت: ڕەنگە کێشەکانی هەردوو باڵەکەی گۆڕان بەمزوانە کۆتاییان نەیەت، هەردوو لاشیان کێبڕکێیانە لەسەر ئەوەی کامیان زووتر کۆنفرانس ئەنجام بدەن و ببنە میراتگری بزوتنەوەی گۆڕانی نەوشیروان مستەفا.