دادگەی فیدراڵی لەسەر نرخی نەوتی سپی لە هەرێمی کوردستان کۆدەبێتەوە

ئاڤا نیوز

 

دادگەی فیدراڵی عێراق دادبینی بۆ سکاڵایەک دەکات، کە لەلایەن جێگری سه‌رۆكی لیژنه‌ی نه‌وت و گازی ئەنجوومەنی نوێنەرانی عێراق لەبارەی گرانی نرخی نەوتی سپی لە هەرێمی كوردستان تۆمارکراوە.

 

وێنە گەورەکە: لە کارنامەی ڕۆژی چوارشەممە 13-03-2024 دادبینی دادگەی فیدراڵیدا، یەكێک لە تەوەرەکان لەبارەی نرخی نەوتی سپی بۆ هه‌رێمی كوردستان و دابینکردنی خزمەتگوزارییەکانە هاوشێوەی پارێزگاکانی دیکەی عێراق.

 

لێدوانی فەرمی: نەهرۆ ڕواندزی، جێگری سه‌رۆكی لیژنه‌ی نه‌وت و گاز لە ئەنجوومەنی نوێنەرانی عێراق بۆ ئاڤا نیوز گوتی، "دەبێت بەغدا هاوشێوەی پارێزگاکانی دیکەی عێراق، خزمەتگوزارییە گشتییەکان بۆ پارێزگاکانی هەرێمی کوردستان دابین بکات و بڕیاری ئەنجوومەنی وەزیران وەک خۆی جێبەجێ بکرێت، نرخی هەر لیترێک نەوتی سپی لە کوردستان له‌ 500 دیناره‌وه‌ بۆ 250 دینار بە هاووڵاتیان بدرێت ."

 

ئەوەی پێویستە بیزانیت: بەگوێرەی ڕێککەوتنی نێوان هەولێر و بەغدا، پێویستە حکومەتی فیدراڵی 200 ملیۆن لیتر نەوتی سپی بۆ هەرێمی کوردستان بنێرێت، دوو کاروانی نەوتەکە نێردراوە، تاوەکو ئێستا زیاتر لە 100 ملیۆن لیتر لای بەغدا ماوە.