وەزارەتی تەندروستی بۆ ئاڤا: هیچ حاڵەتێکی تای خوێنبەربوون لە کوردستان تۆمار نەکراوە

ئاڤا نیوز

وەزارەتی تەندروستی بڵاوكراوەیەك لەبارەی دەركەوتنی چەند حاڵەتێكی تووشبوون بە تای خوێنبەربوون لە هەرێمی كوردستان، لادەبات و وتەبێژی وەزارەتەكەش بۆ ئاڤا میدیا ڕوونكردنەوە دەدات.

چیرۆکی سەرەکی: ئەمڕۆ هەینی، وەزارەتی تەندروستیی حكومەتی هەرێمی كوردستان لەبارەی ڕێكارەكانی كۆنتڕۆڵكردنی نەخۆشیی تای خوێنبەربوون بەتایبەت لەگەڵ نزیكبوونەوەی جەژنی قوربان و سەربڕینی ئاژەڵ بۆ قوربانی، ژمارەیەك ڕێنمایی بۆ وەزارەتی ناوخۆ و گشت پارێزگا و ئیدارە سەربەخۆكان بڵاوكردەوە، لەبەشێكی ڕاگەیێنراوەكە ئاماژەی بە دەركەوتنی چەند حاڵەتێكی نەخۆشی تای خوێنبەربوون لە هەرێمی كوردستان كردبوو، دواتر وەزارەتەكە، بڵاوكراوەكەی خۆی سڕیوەتەوە.

لێدوانی فەرمی: دكتۆر سەركار سورچی، وتەبێژی وەزارەتی تەندروستیی هەرێمی كوردستان بۆ ئاڤا دڵنیایی دا لەوەی هیچ حاڵەتێكی تووشبوون بە نەخۆشی تای خوێنبەربوون لە هەرێمی كوردستان تۆمارنەكراوە و هیچ حاڵەتێكی گوماناویش نییە، ئەوەی بڵاوكراوەتەوە تەنها هەڵەیەكی تایپكردن بوو، بۆیە ڕاستەوخۆ بڵاوكراوەكەمان سڕیوەتەوە.

لەلایەكی دیكەوە: تا ئێستا لە سەرتاسەری عێراق 27 حاڵەتی تووشبوون بە تای خوێنبەربوون تۆماركراوە، چوار لە تووشبووانیش گیانیان لەدەستداوە.

ئەوەی پێویستە بیزانیت: تای خوێنبەربوون نەخۆشییەکی ڤایرۆسییە و لە ئاژەڵەوە بۆ مرۆڤ دەگوازرێتەوە، نیشانەکانی نەخۆشییەکە لەماوەی 3 بۆ 14 ڕۆژدا دەردەکەوێت، گرنگترینیان بریتییە لە بەرزبوونەوەی پلەی گەرمیی جەستە، سەرئێشە و خوێنبەربوونی ژێر پێست .