پارتی و یەكێتی لەسەر شێوازی دابەشكردنی پۆستەكان كۆدەبنەوە

ئاڤا نیوز

 

وابڕیارە سبەی یەكشەممە شاندی باڵای دانوستاندنكاری پارتی دیموكراتی كوردستان و یەكێتیی نیشتمانیی كوردستان لە سلێمانی كۆببنەوە و "گفتوگۆی ئەمجارە لەسەر شێوازی دابەشكردنی پۆستەكان دەبێت".

 

ئەوەی پێویستە بیزانیت: ئەم كۆبوونەوەیە درێژكراوەی كۆبوونەوەكەی ڕۆژی 17ـی ئەم مانگە دەبێت، كە هەردوو لیژنەی باڵا و تەكنیكی شاندی دانوستاندنكار، گفتوگۆكانیان لەبارەی ستراتیژییەت و كارنامەی كابینەی داهاتووی حكومەتی هەرێمی كوردستان بەكۆتا هێنا و گەیشتوونەتە دیدی هاوبەش بۆ پێكەوە كاركردن، هەروەها ڕەشنووسی كارنامەی كابینەی نوێی حكومەتیان ئامادەكردووە.

 

لێدوانی فەرمی: پێشتر وتەبێژی یەكێتیی نیشتمانیی كوردستان تایبەت بە ئاڤا ڕایگەیاند، كۆبوونەوەی داهاتووی هەردوو شاندی دانوستاندنكار لەسەر شێوازی دابەشكردنی پۆستەكان دەبێت.

زانیاریی زیاتر: ئەوکات وتەبێژەکەی یەکێتی ڕوونی کردبوەوە، تا ئێستا پۆستەكان دابەش نەكراون، تەنیا سەرنج و تێبینییەكان لەو بارەیەوە خراوەنەتە ڕوو.

 

لەلایەکی دیکە: بەپێی زانیاریی میدیاكانی یەكێتی، بڕیاربوو كۆبوونەوەكەی سبەی، زووتر بكرێت، بەڵام بەهۆی بەڕێوەچوونی دووەمین دیداری یەكێتی، كۆبوونەوەكە خراوەتە ڕۆژی 27ـی نیسانی 2025.